Bike Rider Killed In Accident: कुर्टी फोंडा येथे महामार्गावर ट्रक आणि दुचाकीत झालेल्या अपघातात दुचाकीस्वाराचा जागीत मृत्यू झाला. अशोक श्याम नाईक (वय 47) असे मृत दुचाकीस्वाराचे नाव आहे.

अशोक नाईक हे मूळचे बागवाडा, खांडेपार येथील रहिवाशी होते. ते काही कामानिमित्त दुचाकीवरून बाहेर पडले असता महामार्गावर आमिगोज जंक्शन येथे अचानक समोरून आलेल्या ट्रकने त्यांना जोराची धडक दिली. ही धडक इतकी जोरदार होती की, दुचाकी थेट ट्रकच्या चाकात आली. यात दुचाकीस्वार अशोक नाईक यांचा जागीच मृत्यू झाला. ट्रक काही अंतर डिव्हायडरवही चढला होता.

अपघाताची माहिती मिळताच, पोलिसांनी तत्काळ घटनास्थळी धाव घेतली. पोलिस पुढील तपास करत आहेत. त्यांनी ट्रकचालकाला ताब्यात घेतले आहे. पार्किंग तसेच वाहतुकीला येथे कसल्याही प्रकारची शिस्त नाही. या रस्त्याकडेला ट्रक पार्किंग केले जात असल्यामुळे येथे अपघात घडत असल्याचे स्थानिकांचे म्हणणे आहे. यावेळी अस्ताव्यस्त पार्किंगमुळे घडणाऱ्या या अपघातांवरून स्थानिकांनी वाहतूक पोलिसांकडे तीव्र प्रतिक्रिया व्यक्त केल्या.

दरम्यान, गोव्यात अपघातांच्या प्रमाणात मोठी वाढ झाली आहे. सोमवारी म्हापसा येथे दोन दुचाकी अपघातांत एकाचा मृत्यू तर एकजण जखमी झाले होते. प्रतिनिधी असलेले दर्शन सिमेपुरुषकर (56, मूळ रा. भाटी-ओशेल) हे दुपारी 12 च्या सुमारास राय-शिवोली येथील घरी जेवणासाठी ॲक्टिवा स्कुटरने जात होते.

हाऊसिंगबोर्ड-म्हापसा येथील सेंट झेवियर कॉलेजच्या मुख्य रस्त्यावर केरळीयन टोळीतील एका दुचाकीसोबत धडक झाल्याने त्यांचा जागीच मृत्यू झाला. कुरपावाडा केळशी येथे सोमवारी दुपारी पावणे तीनच्या सुमारास बस व दुचाकीमध्ये झालेल्या अपघातात आडपई फोंडा येथील दुचाकीस्वार संतोष सुरेश नाईक (35, रा. आडपई) यांचा मृत्यू झाला.