Arvind Kejriwal In Goa: एकीकडे येत्या लोकसभा निवडणुकीत इंडिया आघाडीच्या उमेदवाराला मतदान करा, असे आवाहन करणारे अरविंद केजरीवाल यांनी गोव्यात 'आप'शिवाय पर्याय नाही असे वक्तव्य केले आहे.

गोव्यात मोठी राजकीय पोकळी निर्माण झाल्याचेही केजरीवाल यांनी म्हटले आहे.

आम आदमी पार्टीचे राष्ट्रीय संयोजक आणि दिल्लीचे मुख्यमंत्री अरविंद केजरीवाल गोवा दौऱ्यावर आहेत. त्यांच्यासोबत पंजाबचे मुख्यमंत्री भगवंत मान देखील आहेत.

शुक्रवारी त्यांनी बाणावली येथे वेंझी व्हिएगस यांच्या मतदार संघातील मोहल्ला क्लिनिकला भेट दिली व त्यानंतर आयोजित कार्यक्रमाला संबोधित केले. केजरीवाल यांनी क्रुझ सिल्वा यांच्या मतदारसंघातील कामाचा देखील आढावा घेतला.

भाजप गोव्यात चांगलं काम करतेय म्हणून त्यांना मते मिळतायेत असे नव्हे तर त्यांना सक्षम पर्याय नाही. राज्यात मोठी राजकीय पोकळी निर्माण झाली आहे आणि आता आपशिवाय पर्याय नाही, असे केजरीवाल म्हणाले.

केजरीवाल यांनी कार्यकर्त्यांना संबोधित करताना आप त्यांचा पर्याय असल्याचे असे मतदारांना सांगण्याचे आवाहन केले. राज्य सरकारच्या गडबड घोटाळ्यांवर लक्ष ठेवण्यासाठी पक्षांतर्गत एक संवाद प्रणाली सुरु करण्याचे आवाहन त्यांनी यावेळी केले.

इंडिया आघाडीसोबत जागा वाटपाबाबत चर्चा सुरु असून, गोव्याचा देखील त्यात समावेश आहे, असे केजरीवाल म्हणाले.

दरम्यान, दिल्ली अबकारी घोटाळ्याप्रकरणी केजरीवाल यांना चौथे समन्स बाजवले असून, 18 रोजी त्यांना चौकशीला हजर राहण्याचे आदेश देण्यात आले होते. चौकशीला हजर न राहिल्याने केजरीवाल घाबरत असल्याचा आरोप भाजपने केला.