डिचोली : डिचोलीतील आमठाणे धरणातील जलसाठा घटला असला, तरी धरणातील जलसाठा नियंत्रित ठेवण्यासाठी आता साळ बंधाऱ्यातील पाणी या धरणात सोडण्यात येत आहे. गत महिन्याच्या तुलनेत धरणातील पाण्याच्या पातळीत किंचित घट झाली आहे.

सध्या धरणातील जलसाठ्याची पातळी 46.5 मीटर इतकी आहे. गत महिन्यात ती 46.80 मीटर एवढी होती. हवामानात बदल होताना उष्णतेने कहर केला असला, तरी जलसाठ्यात मोठी घट झालेली नाही.

मेणकूरे-धुमासे पंचायत क्षेत्रात येणाऱ्या आमठाणे धरणाचे क्षेत्र 582 हेक्टर मीटर एवढे आहे. तर पाण्याची पातळी 50 मीटर एवढी आहे. मंगळवारपर्यंत या धरणातील जलसाठ्याची पातळी 46.5 मीटर एवढी होती, अशी माहिती मिळाली आहे. गत वर्षी समाधानकारक मोसमी पाऊस पडल्यानंतर आमठाणे धरणातील जलसाठ्याची पातळी समाधानकारक होती.

जलसाठ्यावर परिणाम नाही

आमठाणे धरणातील पाणी अस्नोडा जलशुद्धीकरण प्रकल्पात सोडण्यात येते. धरणातील जलसाठ्यात घट होऊ लागली, की जलसाठा नियंत्रित ठेवण्यासाठी साळ येथील शापोरा नदीवरील बंधाऱ्यातील पाणी मोठ्या जलवाहिनीद्वारे या धरणात सोडण्यात येते. मोसमी पाऊस सुरू होईपर्यंत धरणातील जलसाठ्यात फार मोठा परिणाम होणार नाही, असा जलस्रोत खात्याचा दावा आहे.

पाण्याचा जपून वापर करावा

राज्यात साधारणपणे जूनच्या पहिल्या आठवड्यात मान्सूनची अपेक्षा असते. मात्र गेल्या काही वर्षांतील अनुभव पाहता पाऊस जूनच्या मध्यापर्यंत राज्यात दाखल होत नाही. ही स्थिती यंदा आल्यास राज्यात अनेक ठिकाणी तीव्र पाणीटंचाई निर्माण होईल. त्यामुळे लोकांनी पुढील काळात पाण्याचा जपून वापर करावा, असे आवाहन करण्‍यात आले आहे.

समाधानकारक स्थिती : पावसाळ्यात हे धरण दोन वेळा तुडुंब भरले होते. दरवर्षी साधारण एप्रिल-मे महिन्यात धरणातील जलसाठ्यात घट होऊन सभोवतालचे पात्र कोरडे पडत असते. मात्र, यंदा स्थिती समाधानकारक आहे.