डिचोली: चारचाकी आणि मोटारसायकलमध्ये झालेल्या भीषण अपघातात एका १६ वर्षीय मुलाचा मृत्यू झाला. या अल्पवयीनाचे नाव मोहम्मद सादिक खानजादे असे आहे. मोटारसायकलवर मागे बसलेला त्याचा धाकटा भाऊ १४ वर्षीय हजरत अली खानजादे हा गंभीर जखमी असून त्याच्यावर गोमेकॉत उपचार सुरु आहे. त्याची प्रकृती चिंताजनक असल्याची माहिती मिळाली आहे.

हा अपघात रविवारी सायंकाळी डिचोली-साखळी मुख्य रस्त्यावर कुळण-सर्वण येथे आधार हॉस्पिटलजवळ घडला. डिचोलीत राहणारे आणि मूळ कुळे-धारबांदोडा येथील मोहम्मद सादिक आणि हजरत २-बी-२४६१ या क्रमांकाच्या मोटारसायकलवरुन साखळीहून डिचोलीच्या दिशेने जात होते.

जीए-०३-बी-७०९१ या क्रमांकाची ‘ओमनी व्हॅन’ साखळीच्या दिशेने जात होती. वाठादेव येथे राहणारे पांडुरंग मालवणकर हे व्हॅन चालवत होते. कुळण येथे पोचताच मोटारसायकल आणि व्हॅनची समोरासमोर जबर धडक बसली. यात दुचाकीचालक १६ वर्षीय मोहम्मद सादिक आणि त्याचा भाऊ हजरत अली हे दोघेही गंभीर जखमी झाले.

जखमींना उपचारार्थ इस्पितळात नेले असता, डॉक्टरांनी मोहम्मद सादिक याला मृत घोषित केले. डिचोली पोलिसांना या अपघाताची माहिती मिळताच त्यांनी घटनेचा पंचनामा केला. याप्रकरणी डिचोली पोलिसांनी व्हॅन चालकास अटक केली आहे.