डिचोली: शहरात परप्रांतीय मजुरांची समस्या कायम असून, ते स्थानिकांसाठी डोकेदुखी ठरत आहेत. या मजुरांचा आकडाही वाढत चालला आहे. गेल्या पाच-सहा महिन्यांपासून शहरात नवीन मजुरांची भर पडली असून, बिहार, उत्तर प्रदेश, झारखंड या राज्यांतून हे मजूर दाखल झाले आहेत.

नव्याने आलेल्या परप्रांतीय मजुरांकडे पोलिस कार्ड आदी आवश्यक कागदपत्रे आहेत की नाहीत, याबाबतही प्रश्नचिन्ह निर्माण झाले आहे. त्यामुळे पुन्हा एकदा भाडेकरू पडताळणी मोहीम राबविण्याची आवश्यकता निर्माण झाली आहे. दरम्यान, अधूनमधून पोलिस या मजुरांची धरपकड करीत असल्याचे दिसून येते; मात्र अजूनतरी मजुरांच्या गर्दीवर नियंत्रण आलेले नाही.

गेल्या बऱ्याच वर्षांपासून डिचोलीत परप्रांतीय मजुरांची संख्या हळूहळू वाढत आहे. मजुरीच्या शोधात रोज सकाळी शहरात मजुरांचा वावर असतो. त्यात बसस्थानक परिसरात उभे राहणाऱ्या मजुरांची संख्या मोठी आहे.

बसस्थानक परिसरात रोज सकाळी तास-दीड तास कर्नाटक, झारखंड, उत्तर प्रदेश, बिहार आदी राज्यांतील मिळून ६०० हून अधिक मजूर दाटीवाटीने उभे राहिलेले दिसून येतात. त्यात काही स्थानिक मजुरांचाही समावेश असतो.

रोज सकाळी आठ वाजल्यापासून बसस्थानक परिसरात मजुरांची गजबज असते. बसस्थानक परिसरात त्यांची संख्या अधिक असते.

अनर्थ घडण्याची भीती

बसस्थानक परिसरातील मजुरांचा अडथळा दूर करण्यासाठी पोलिसांनी कारवाई केल्यास काही दिवस हे मजूर जागा बदलतात; मात्र काही दिवसांनी पुन्हा बसस्थानक परिसरात गर्दी करतात. बसस्थानकाबाहेर दाटीवाटीने उभे राहणाऱ्या या मजुरांमुळे सकाळी साधारण एक-दीड तास वाहतुकीस अडथळा निर्माण होत असतो.

मजुरांच्या गर्दीमुळे प्रवासी बसगाड्या आत-बाहेर घेताना बसचालकांना अक्षरशः कसरत करावी लागते. एखाद्या वेळी मोठा अनर्थ घडण्याची भीती व्यक्त होत आहे. त्यामुळे या समस्येवर तोडगा काढण्यासाठी पालिका किंवा संबंधित यंत्रणांनी ठोस उपाययोजना कराव्यात, अशी मागणी वाहनचालकांसह जागरूक नागरिकांकडून करण्यात येत आहे.