डिचोली: भातशेती बहरण्याच्या मार्गावर असतानाच पावसाने पुन्हा पाठ फिरवल्याने येथील बळीराजा चिंताग्रस्त बनला आहे. चतुर्थीनंतर दहा-बारा दिवसांच्या विश्रांतीनंतर दोन-तीनवेळा हलक्या सरी बरसल्याने शेतकऱ्यांच्या आशा पल्लवित झाल्या होत्या; मात्र गेल्या सात-आठ दिवसांपासून दमदार पाऊस न झाल्याने चिंता पुन्हा वाढली आहे.

यंदा मान्सूनच्या सुरुवातीलाच पावसाने ओढ दिल्याने खरीप भातशेती साधारण महिनाभर लांबणीवर पडली होती. त्यानंतर भातशेती चांगली बहरली असून आता कणसे धरण्याची प्रक्रिया सुरू झाली आहे. अशावेळी पुढील दोन-तीन दिवसांत पोषक पाऊस न पडल्यास भातपीक संकटात येण्याची भीती शेतकऱ्यांना वाटत आहे.

गेल्या दोन दिवसांपासून ढगाळ वातावरण असूनही पाऊस मात्र गायब आहे. आता मुबलक पाऊस झाला नाही तर हातातोंडाशी आलेला घास करपून जाण्‍याची भीती आहे.

- विष्णू गिमोणकर, शेतकरी (पिळगाव)