Bicholim Farmers against Vedanta: वेदांता (सेसा) खाण कंपनीने स्थानिक कामगारांना घरी पाठवल्याने पिळगावमधील शेतकरी आता आक्रमक बनले आहेत. स्थानिकांना कामावर घेत नसाल, तर आमच्या शेती पूर्ववत आम्हाला द्या, अशी मागणी शेतकऱ्यांनी केली आहे.

आम्हाला न्याय मिळाला नाही, तर सारमानस रस्त्यावरून खनिज वाहतूक करण्यास प्रतिबंध करण्यात येईल. वेळप्रसंगी न्यायालयात धाव घेण्यात येईल, असा इशाराही या शेतकऱ्यांनी दिला आहे.

पिळगावमधील कामगारांना खाण कंपनीने घरी पाठविल्याने कामगारांसह स्थानिक शेतकरी आता आक्रमक बनले आहेत. संतप्त शेतकऱ्यांसह शंभरहून अधिक लोक रविवारी (ता. 26) सारमानस रस्त्यावर उतरले. या शेतकऱ्यांनी खाण कंपनी विरोधात दंडही थोपटले आहे.

जवळपास अर्धा तास रस्त्यावर धरणे धरल्यानंतर शेतकऱ्यांनी आपल्या व्यथा मोकळ्या केल्या. बेरोजगारीची कुऱ्हाड कोसळलेले स्थानिक कामगारही शेतकऱ्यांसह रस्त्यावर उतरले होते.

कामगारांना केले बेरोजगार

गावातील लोकांना रोजगार मिळणार या आशेने आम्ही शेतजमिनीवर पाणी सोडून खाण कंपनीला सहकार्य केले होते. मात्र, आता खाण कंपनीने गावावरच अन्याय केला आहे. खाण व्यवसायामुळे आमच्या शेतजमिनी नष्ट झाल्या आहेत.

खाणमाती आदी गाळ साचून शेतजमिनी बुजल्या आहेत. त्यामुळे गेल्या बऱ्याच वर्षांपासून शेती पडीक असून खाण कंपनीकडून नुकसान भरपाईही मिळत नाही.

आता तर वेदांता (सेसा) खाण कंपनीने स्थानिक कामगारांना काढून त्यांना बेरोजगार केले आहे, अशी व्यथा शेतकऱ्यांनी मांडली.

...तर न्यायालयात

नुकसान भरपाई सोडाच, उलट आता खाण कंपनीकडून स्थानिक कामगारांच्या पोटावर पाय ठेवण्यात आला आहे. त्यामुळे आता आम्ही करायचे काय, असा प्रश्न शेतकऱ्यांनी उपस्थित केला आहे. कुटुंबाच्या उदरनिर्वाहाचा प्रश्न सोडविण्यासाठी आमच्या शेतजमिनी आम्हाला हव्या आहेत.

शेतीतील गाळ काढून आमच्या शेती आम्हाला द्या. अशी मागणी अनिल वायंगणकर, सुधाकर वायंगणकर आदी शेतकऱ्यांनी केली आहे. या मागणीकडे दुर्लक्ष झाल्यास सारमानस रस्त्यावरुन खनिज वाहतूक करायला देणार नाही, असा इशारा शेतकऱ्यांनी दिला आहे.

वेळप्रसंगी राष्ट्रीय हरित लवादाकडे दाद मागण्यात येईल. असे सुधाकर वायंगणकर यांनी स्पष्ट केले आहे.