डिचोली: पावसाळ्यात मलेरिया, डेंग्यू आदी साथीचे रोग फैलावण्याचा धोका असला, तरी डिचोलीत परिस्थिती सुस्थितीत आहे. सद्यःस्थितीत डिचोली सामाजिक आरोग्य केंद्राच्या कार्यक्षेत्रात डेंग्यू आणि मलेरियाचा एकही रुग्ण नाही. अशी माहिती आरोग्य केंद्राच्या सूत्रांकडून मिळाली आहे. महिन्यापूर्वी डिचोलीत डेंग्यूचे दोन रुग्ण आढळून आले होते. त्यामुळे पावसाळ्यात डेंग्यू फैलावण्याचा धोका निर्माण झाला होता.

डिचोली शहरात पावसाळ्यातील आजार वा रोगराई नियंत्रणात असली, तरी मागील काही दिवसात डेंग्यूचे दोन संशयित रुग्ण आढळून आले होते. अशी माहिती सामाजिक आरोग्य केंद्रातून मिळाली आहे. दोन वर्षांपूर्वी डिचोली शहरातील बोर्डे परिसरात एका बांधकामाच्या ठिकाणी मलेरियाचा फैलाव झाला होता. परिसरातील जवळपास 35 जणांना मलेरियाची लागण झाली होती. यंदा अजूनतरी शहरात तसा धोका निर्माण झालेला नाही. मागील सात महिन्यात आतापर्यंत शहरात एकही मलेरियाचा रुग्ण आढळून आलेला नाही. अशी माहिती मिळाली आहे.

प्रतिबंधात्मक उपाययोजना

डिचोली शहरात पावसाळ्यातील आजार टाळण्यासाठी डिचोली सामाजिक आरोग्य केंद्रातर्फे प्रतिबंधात्मक उपाययोजना हाती घेण्यात आल्या आहेत. बांधकाम ठिकाणी निर्माण होणारी अस्वच्छता आणि मजुरांमुळे 'मलेरिया' आदी रोगराई फैलावण्याची अधिक संभावना असते. त्याची दखल घेत आरोग्य केंद्रातर्फे बांधकाम चालू असलेल्या जागांची पाहणी करण्यात येत आहे. मजुरांचीही तपासणी करण्यात येत आहे. स्वच्छता आदी नियम पाळण्याची सूचनाही बांधकाम कंत्राटदारांना करण्यात आली आहे. शहरात जंतूनाशक औषध फवारणी करण्यात येत आहे. अशी माहिती डिचोली आरोग्य केंद्राच्या आरोग्य अधिकारी डॉ.मेधा साळकर यांनी दिली.