डिचोली, मामलेदार कार्यालय आणि पालिकेने डिचोली बाजारात केलेल्या संयुक्त कारवाईत काही दुकानातून ''सिंगल युज'' प्लास्टिकसह तंबाखूजन्य पदार्थ जप्त केले. सिंगल युज प्लास्टिकसह तंबाखूजन्य पदार्थ बाळगणाऱ्या काही व्यापाऱ्यांविरोधात गुन्हा नोंद करून त्यांच्याविरोधात दंडात्मक कारवाई केली.

मामलेदार प्रवीण गावस आणि पालिकेचे मुख्याधिकारी सचिन देसाई यांच्या नेतृत्वाखाली पोलिसांच्या सहकार्याने आज (सोमवारी) सायंकाळी बाजारासह बसस्थानक परिसरात धडक कारवाई करुन काही दुकानातून ''सिंगल युज'' प्लास्टिकसह गुटखा, सिगारेट आदी तंबाखूजन्य पदार्थ मिळून हजारो रुपये किमतीचा ऐवज जप्त करण्यात आला.

गुटखा खाण्याच्या तयारीत असताना एका राज्याबाहेरील मजुरालाही ताब्यात घेण्यात आले. या मोहिमेत पालिका तसेच मामलेदार कार्यालयातील अधिकारी आदी कर्मचाऱ्यांसह पोलिस अधिकारी आणि पोलिस कॉन्स्टेबल सहभागी झाले होते.

आजच्या मोहिमेत नगरसेवक विजयकुमार नाटेकर, ॲड. रंजना वायंगणकर, मिनरल फॉउंडेशनच्या करिश्मा ताटे यांच्यासह सूर्यकांत देसाई, व्यंकटेश नाटेकर, उद्धव कशाळीकर, कॅजीटन वाझ, सुधीर आचार्य, राधिया देसाई, वनश्री चोडणकर आदी स्वच्छतादूत सहभागी झाले होते.डिचोली शहर प्लास्टिक आणि तंबाखूमुक्त व्हावे.

त्यासाठी ही धडक कारवाई हाती घेण्यात आली होती यापुढेही ही मोहीम चालूच राहणार आहे, अशी माहिती डिचोलीचे मामलेदार प्रवीण गावस आणि पालिकेचे मुख्याधिकारी सचिन देसाई यांनी दिली. बाजारातील दुकानदारांनी सिंगल युज प्लास्टिक आणि तंबाखूजन्य पदार्थांची विक्री बंद करुन शहर प्लास्टिक आणि तंबाखूमुक्त ठेवण्यासाठी सहकार्य करावे, असे आवाहनही अधिकाऱ्यांनी केले आहे.