Amthane Dam Storage Updates

डिचोली: जानेवारी महिना संपण्याच्या वाटेवर असला, तरी डिचोलीतील ‘आमठाणे’ धरणात अजूनतरी समाधानकारक जलसाठा आहे. सध्याचा जलसाठा पाहता, आणखी किमान दोन ते तीन महिने धरणातील जलसाठ्यावर मोठासा परिणाम होणार नसल्याचे संकेत मिळत आहेत.

जलस्रोत खात्याच्या अधिकाऱ्यांनाही तसा आशावाद व्यक्त केला आहे. उत्तर गोव्याची तहान भागवणाऱ्या अस्नोडा जलशुद्धीकरण प्रकल्पात आमठाणे धरणातून पाणी पुरवठा करण्यात येत आहे.

मेणकूरे-धुमासे पंचायत क्षेत्रात येणाऱ्या आमठाणे धरणाचे कार्यक्षेत्र ५८२ हेक्टर मीटर एवढे आहे. तर पाण्याची पातळी ५२ मीटर एवढी आहे. गेल्या पावसाळ्यात हे धरण ''फूल्ल'' झाले होते. शनिवारपर्यंत (ता. १८) या धरणातील जलसाठ्याची पातळी ४८.५ मीटर एवढी होती. धरणातील सध्याचा जलसाठा पाहता पुढील किमान दोन ते तीन महिने काळजी करण्याचे कारण नाही. असे जलस्रोत खात्याचे म्हणणेआहे.

दरवर्षी साधारण फेब्रुवारी महिन्यात धरणातील जलसाठा कमी होत असतो. यंदा मात्र तशी स्थिती उद्‍भवणार नाही, असा अंदाज आहे. या धरणातील जलसाठ्यावर परिणाम जाणवू लागला, की जलसाठा नियंत्रित ठेवण्यासाठी साळ बंधाऱ्यातून या प्रकल्पात पाणी सोडण्यात येते.