डिचोली: डिचोलीतील बगलमार्गावरील व्हाळशी जंक्शनवर ट्रकची मोटारसायकलला धडक बसल्याने मोटारचालक गंभीर जखमी झाला. हा अपघात रविवारी दुपारी घडला. जखमी मोटारसायकल चालक म्हापसा परिसरातील असून, त्याच्यावर इस्पितळात उपचार चालू आहेत. अशी माहिती मिळाली आहे.

यासंबंधीची माहिती अशी की, एमएच-०४ के-एफ-६९९५ या क्रमांकाचा मालवाहू ट्रक बगलमार्गावरून म्हापसाच्या दिशेने जात होता. ट्रक व्हाळशी जंक्शनवर पोचताच मुख्य रस्त्यावरुन डिचोलीच्या दिशेने जाणाऱ्या जीए-०३-क्यू-६३९१ या क्रमांकाच्या मोटारसायकलला ट्रकची धडक बसली. त्यात मोटारसायकल चालक गंभीर जखमी झाला.

लागलीच जखमी चालकाला उपचारार्थ डिचोलीच्या सामाजिक आरोग्य केंद्रात नेण्यात आले. डिचोली पोलिसांना या अपघाताची माहिती मिळताच त्यांनी घटनास्थळी जाऊन पंचनामा केला. पोलिसांनी ट्रक चालकाला ताब्यात घेतले. पोलिस पुढील तपास करीत आहेत.

गेल्यावर्षी जून महिन्यात वाठादेव-व्हाळशी चौपदरी बगलमार्गाचे लोकार्पण करण्यात आले असून, या बगलमार्गावर खास करुन व्हाळशी जंक्शनवर अपघातांचे सत्र चालूच आहे. आतापर्यंत या व्हाळशी जंक्शनवर मिळून बगलमार्गावर पंधराहून अधिक अपघात घडले आहेत.

जवळपासच्या लोकांना होणारा मनस्ताप आणि तक्रारीची दखल घेवून बांधकाम खात्याकडून बगलमार्गाच्या जंक्शनवरील रंब्लर्स अलीकडेच काढण्यात आले आहेत. मात्र अद्याप ''गतीरोधक'' बसविलेले नाहीत. अपघातांवर नियंत्रण येण्यासाठी बगलमार्गावर ''गतीरोधक'' बसवावेत, अशी मागणी रोहिदास गाड आदी स्थानिकांनी केली आहे.