फोंडा: फोंडा-पणजी महामार्गावरील भोम ते जुने गोवेपर्यंतच्या चौपदरी रस्त्याच्या कामासाठी केंद्र सरकारने एकूण १ हजार ६० कोटी २१ लाख रुपये मंजूर केले असून या कामाला आता लवकरच सुरवात होणार आहे.

मात्र भोम गावातून चौपदरी रस्ता नकोच, बगल मार्ग उभारा आणि गावाचे अस्तित्व टिकवा, अशी मागणी करणाऱ्या भोमवासीयांचा विरोध डावलून जोर जबरदस्तीने या कामाला सुरुवात होणार असण्याची शक्यता वर्तवण्यात येत आहे. त्यामुळे सरकार विरोधात भोमवासीय असा संघर्ष अटळ असल्याची शक्यता व्यक्त करण्यात येत आहे.

खुद्द केंद्रीय रस्ते महामार्ग खात्याचे मंत्री नितीन गडकरी यांनी बेळगाव ते पणजी चौपदरी महामार्ग निर्धारित वेळेत पूर्ण करण्याची सूचना संबंधित खात्याला केली असून बराच काळ रखडलेल्या भोम ते जुने गोवे रस्त्यासाठी प्राधान्य दिल्याची घोषणा केंद्रीय मंत्री नितीन गडकरी यांनी केली आहे. बाणस्तारीचा सध्याचा पूल दुहेरी वाहतुकीचा असून हा पूल चौपदरी होणार आहे.

खांडेपार ते पणजी हा चौपदरी महामार्ग पूर्ण करण्यात येत असून सध्या फोंडा ते प्रियोळ व त्यापुढे भोम ते खोलीं जुने गोवे पर्यंतच्या रस्त्याचे काम रखडलेले आहे. हा भाग अरुंद असून या मार्गावर कायम वाहतूक कोंडी होत असते, ज्याचा त्रास स्थानिकांबरोबर पर्यटक व मालवाहतूकदारांना होतो.

गावाबाहेरून रस्ता करा !

आम्हाला चौपदरी रस्ता हवा आहे; पण तो गावातून नव्हे, तर गावाबाहेरून, असा पुनरुच्चार भोमवासीयांनी केला आहे. आमचा लढा हा गाव वाचवण्यासाठी, येथील संस्कृती रक्षणासाठी आहे आणि गावाबाहेरून जर चौपदरी रस्ता करणे शक्य आहे तर मग सरकारचा हा अट्टहास का, असा सवाल भोमवासीयांनी केला आहे.