भाऊसाहेब बांदोडकर हे खऱ्या अर्थाने मुक्त गोव्याचे दिशादर्शक ठरले. बहुजन समाजाला स्वाभिमानाने जगण्याची ताकद त्‍यांनी दिली. येत्या ऑगस्टमध्ये भाऊसाहेब बांदोडकरांची 50वी पुण्यतिथी आहे. तेव्हा म्हापसा शहरात पुण्यतिथीचा कार्यक्रम वर्षभर विविध उपक्रमांनिशी साजरा करण्यात येणार आहे, अशी माहिती भाऊप्रेमी तथा माजी नगरसेवक तुषार टोपले यांनी दिली.

म्हापसा येथील श्री महारुद्र देवस्थानच्या समोरील भाऊसाहेबांच्या पुतळ्याला ज्येष्ठ शिक्षक दामोदर (बाबू) नाटेकर व समाजकल्याण खात्याचे निवृत्त संचालक सुभाष शिरोडकर यांनी पुष्पहार अर्पण करून प्रमुख पाहुणे या नात्याने अभिवादन केले.

भाऊंच्‍या 112व्या जयंतीदिनी मगो नेते भारत तोरस्कर, केंद्रीय समिती सदस्य श्रीपाद येंडे, एकनाथ म्हापसेकर, नगरसेविका शुभांगी वायंगणकर, नगरसेखर चंद्रशेखर बेनेकर, डॉ. नूतन बिचोलकर, रमेश मणेरकर, नारायण राठवड, प्रेमानंद दिवकर, सचिन किटलेकर, शेखर कवळेकर, राजू कुडतरकर, गुरुदास वायंगणकर, सुभाष येंडे, हेमंत दिवकर आदी भाऊप्रेमींनी अभिवादन केले.

भाऊसाहेब बांदोडकर यांनी गावागावांमध्ये शिक्षणाची गंगा आणल्यामुळे सामान्य माणूस ज्ञानसंपन्न झाला व उच्चपदावर पोचला. मात्र दुर्दैवाने या मंडळींना आज भाऊसाहेबांचा विसर पडला आहे.

भाऊसाहेबांचे कार्य सामान्य जनतेपुढे नेण्यासाठी संघटित कार्य करुया, असे आवाहन पत्रकार तथा माजी नगरसेवक नारायण राठवड यांनी केले. नगरसेविका शुभांगी वायंगणकर, डॉ. नूतन बिचोलकर यांनीही मनोगत व्यक्त केले.