Illegal Hotels in Goa: गोवा हे देशी पर्यटकांचे आवडीचे डेस्टिनेशन आहे. येथे देशभरातून कोट्यवधी पर्यटक दरवर्षी येत असतात. तथापि, गोव्यातील पर्यटनाच्या नावाखाली अनेकांची फसवणूक होत असल्याचे प्रकारही उघडकीस येतात. त्यामुळे गोवा सरकार वारंवार पर्यटकांसाठी विविध माहिती जारी करत असते.

समोर आलेल्या नव्या माहितीनुसार राज्यात 300 हून अधिक बेकायदा हॉटेल्स सुरू आहेत. खुद्द पर्यटन मंत्री रोहन खंवटे यांनीच ही माहिती विधानसभेतील उत्तरात दिली आहे.

त्यामुळे गोव्यात येण्याआधी, येथे राहण्यासाठी हॉटेल बूक करण्याआधी आपण बेकायदा हॉटेलमध्ये तर नोंदणी करत नाही ना, याची काळजी पर्यटकांनी घेण्याची गरज आहे. अन्यथा त्यांची फसवणूक होऊन त्यांना नाहक त्रासाला सामोरे जावे लागू शकते.

मंत्री खंवटे यांच्या माहितीनुसार राज्यातील उत्तर गोवा जिल्ह्यातील 188 तर दक्षिण गोव्यातील 113 हॉटेल्सची अशा एकूण 301 हॉटेल्सची पर्यटन विभागाकडे नोंदणीच नाहीय. त्यामुळे ही हॉटेल्स तांत्रिकदृष्ट्या बेकायदेशीर आहेत. नोंदणी नसल्याने या हॉटेल्सना नोटिस बजावण्यात आली आहे.

दरम्यान, पर्यटन विभागाने टाईम सॉफ्टवेयर आणले आहे. त्याद्वारे हॉटेलमधील सर्व माहिती मिळवली जाते. त्यात पर्यटकांचा ओघ, पर्यटकांनी गोव्यात घालवलेला वेळ, त्यांचे नागरीकत्व आणि इतर गोष्टीही त्यातून कळू शकतात.

पर्यटकांनी अशा बेकायदेशीर हॉटेल्समध्ये जर बुकिंग केले तर त्यांना विनाकारण त्रासाला सामोरे जावे लागू शकते. पर्यटनासाठी म्हणून यायचे आणि इथे वेगळ्याच अडचणीत अडकायचे, असे होऊ नये म्हणून पर्यटकांनीच आता याबाबत सतकर्ता बाळगण्याची गरज आहे.

दरम्यान, हॉटेलच्या नावाने बनावट वेबसाईट्सद्वारे पर्यटकांची लूट होत असल्याचा मुद्दा विधानसभेत उपस्थित झाला होता. अशा रितीने फसवणूक होऊ नये म्हणून गोवा पर्यटन विभागाच्या 1364 या हेल्पलाईन क्रमांकावर फोन करून खात्री करून घेता येऊ शकते. किंवा गोवा पर्यटन विभागाच्या वेबसाईट्सवर विविध अधिकाऱ्यांचे संपर्क क्रमांक आहेत, त्यांच्याशीही संपर्क साधता येऊ शकतो.