मडगाव: मडगावातील एका नामांकित डॉक्टरला बाणावली येथे त्याच्या विला मध्ये चाकूचा धाक दाखवून लुबाडण्याची खळबळजनक घटना सोमवारी (ता.६) रोजी रात्री पावणे नऊच्या सुमारास घडली. चोरट्याने, त्यांच्या गाळ्यातील  सोनसाखळी व पाकीट हिसकावून नेऊन अंदाजे दीड लाखांचा ऐवज पळविला.

या प्रकरणी या डॉक्टरने कोलवा पोलिस ठाण्यात रीतसर तक्रार नोंदविली आहे. पोलिसांनी भारतीय  न्याय संहितेच्या कलम ३२९(३),११५(२) ३५१ (३),३०९ (४) व १२७ (२) या कलमाखाली अनोळखी इसमावर गुन्हा नोंद केला आहे. 

पोलिस निरीक्षक विक्रम नाईक यांच्या मार्गदर्शनाखाली उपनिरीक्षक निखिल खाजनेकर पुढील तपास करीत आहेत.

पोलिसांनी दिलेल्या माहितीनुसार त्या चोरट्याने ‘विला’मध्ये शिरला. दरवाजा उघडा होता. आत डॉक्टर होते. त्याने चाकूचा धाक दाखविला व ढकलून खाली पाडले  व त्यांना लुटून, कारची चावी , घराची चावी व अन्य वस्तू पळविल्या. 

कोलवा पोलिसांशी संपर्क साधला असता, तक्रारदाराने  संशयिताचे वर्णन केले असून , सीसीटीव्ही  कॅमेऱ्याच्या  माध्यमातून सध्या  पुढील तपास चालू आहे. तूर्त तपास प्राथमिक स्तरावर असल्याने अधिक माहिती देणे पोलिसांनी टाळले आहे.