मडगाव: नागमोडे-नावेली येथील बेकायदा कत्तलखान्याचा बजरंग दल गोरक्षाने पर्दाफाश केला. एका पिकअप रिक्षेत साठवून ठेवलेले अंदाजे ७०० किलो बीफ जप्त केले. तसेच एका रेड्याची सुटका करण्यात आली.

या प्रकरणी मडगाव पोलिसांनी हैदर बेपारी याला ताब्यात घेऊन नंतर अटक केली. बजरंग दल व जिल्हा प्राणी क्रूरता प्रतिबंधक समितीच्या अधिकाऱ्यांकडून येथे चालू असलेला हा गैरव्यवहार उघडकीस आणला.

गुरुवारी रात्री साडेअकरा वाजता नागमोडे-नावेलीतील स्थानिकांकडून रस्त्यावर रक्त दिसून आल्याची व बेकायदेशीर गुरांची कत्तल झाल्याचा संशय मडगाव बजरंग दलाचे कार्यकर्ते भगवान रेडकर यांच्याकडे व्यक्त केला.

बजरंग दलाच्या कार्यकर्त्यांनी घटनास्थळी येऊन पाहिले असता रक्त आढळलेल्या ठिकाणापासून नजिकच एका टाटा पिकअप रिक्षेत रेड्याचे मांस आढळून आले. यावेळी दक्षिण गोवा जिल्हा प्राणी क्रूरता प्रतिबंधक समितीचे अधिकारी राज हे देखील दाखल झाले. तसेच मडगाव पोलिसांनाही घटनास्थळी बोलावण्यात आले.

पिकअप रिक्षेमध्ये दोन रेड्यांची बेकायदेशीर कत्तल करून अंदाजे ७०० किलो मांस ठेवण्यात आले होते. रेडकर यांनी दिलेल्या माहितीनुसार नागमोडी-नावेली या ठिकाणी बेकायदेशीर गुरांच्या कत्तलीचा प्रकार स्थानिकांनी दिलेल्या माहितीनुसार उघडकीस आला.