चिंचणी येथे सोमवारी उशिरा रात्री लागलेल्या भीषण आगीत एका ७० वर्षीय महिलेचा होरपळून मृत्यू झाल्याची दुर्दैवी घटना घडली. ही महिला अंथरुणाला खिळलेली असल्याने तिला वेळेत बाहेर काढता आले नाही, अशी माहिती कुंकळ्ळी येथील पोलीस निरीक्षक दियोगो ग्रासियास यांनी दिली.

मृत महिला आणि तिचा भाऊ हे दोघे भाड्याच्या खोलीत राहत होते. रात्री अचानक आग लागल्याने परिसरात घबराट पसरली. आग वेगाने पसरल्यामुळे घर पूर्णपणे जळून खाक झाले. महिलेचा भाऊ स्वतःचा जीव वाचवण्यात यशस्वी झाला; मात्र त्यालाही दुखापती झाल्या असून त्याच्यावर उपचार सुरू आहेत.

आग लागल्याची माहिती मिळताच कुंकळ्ळी अग्निशमन दल घटनास्थळी दाखल झाले. त्यांनी आगीवर नियंत्रण मिळवले; परंतु तोपर्यंत मोठे नुकसान झाले होते. घरातील साहित्य जळून गेले असून परिसरात हळहळ व्यक्त होत आहे.

घटनेनंतर पोलिसांनी पंचनामा करून मृतदेह दक्षिण गोवा जिल्हा रुग्णालयाच्या शवागारात हलवला आहे. आगीचे नेमके कारण अद्याप समजू शकले नसून याबाबत पुढील तपास सुरू आहे.