पेडणे: मोपा आंतरराष्ट्रीय विमानतळाच्या सभोवतालीच्या गावात एकूण 43 पाण्याचे झरे होते. मोपा विमानतळाच्या रनवेपासूनच्या काही अंतरावरच हाळी या गावात एक नैसर्गिक झरा होता. परंतु तो झरा आता आटून गेला आहे. हा झरा मोपा आंतरराष्ट्रीय विमानतळामुळे आटला असावा, असा अंदाज जाणकारांनी व्यक्त केला आहे. या झऱ्याची वोलसाण फक्त आता शिल्लक आहे.

मोपा आंतरराष्ट्रीय विमानतळाच्या शेजारील जवळच्या गावात हा झरा वाहत होता. सभोवतालच्या झऱ्यांचे जतन करून विमानतळाचे काम झाले पाहिजे, अशी अट सर्वोच्च न्यायालयाने विमानतळाला हिरवा कंदील देताना घातली होती. मोपा विमानतळाच्या कामासाठी मोठ्या प्रमाणात झाडांची कत्तल करून पर्यावरणाची हानी केल्यामुळे हा झरा बंद झाल्याचे स्थानिक भास्कर नारुलकर यांनी सांगितले.

या झऱ्यावर पूर्ण हाळी हा गाव यापूर्वी अवलंबून होता. या झऱ्याचे पाणी पिण्यासाठी व इतर कामांसाठी पूर्ण गाव वापरत असे. नळ आल्यानंतर झऱ्याचे पाणी वापरायचे लोकांनी कमी केले. परंतु तो झरा वाहत तसाच होता, गावातील युवक कधीतरी वनभोजन करण्यासाठी त्या झऱ्यावर जात असत. परंतु तो झरा आता पूर्णपणे आटला असल्याचे भास्कर नारुलकर यांनी सांगितले.

बेसुमार वृक्षतोडीचा परिणाम

या झऱ्याच्या पाण्याने गावात यापूर्वी कोणतेही आजार पसरल्याचे ऐकिवात नसल्याचे त्यांनी सांगितले. या नैसर्गिक झऱ्याचा प्रवाह आता संपुष्टात आला आहे. याचे कारण म्हणजे मोपा विमानतळामुळे झालेली पर्यावरणाची हानी व बेसुमार वृक्षतोड हेच असू शकते असे मत भास्कर नारुलकर यांचे आहे. सरकार मार्फत हा झरा का आटला याचा शोध लावायला हवा जेणेकरून परिसरातील इतर झरे सुरक्षित राहतील.

आरोग्यदायी महत्त्व

यापूर्वी जलस्त्रोत खात्यातर्फे जवळपास तीन लाख रुपये खर्च करून हा झरा जतन करण्यासाठी बांधकाम केले होते. हाळी गावचे या झऱ्याशी भावनिक संबंध जुळलेले आहेत. होळीच्या दिवसात सर्वजण याच झऱ्यावर अंघोळ करण्यासाठी जातात ही त्यांची भावनिक परंपरा आहे. या झऱ्याच्या पाण्याने आंघोळ केल्यानंतर शरीराला बाहेरून असलेले काही आजार दूर होतात असाही समज स्थानिकांमध्ये आहे.

सांडपाणी सोडणार कोठे?

मिळालेल्या माहितीनुसार, मोपा विमानतळावर अजूनही सांडपाणी सोडण्याकरिता कोणतीही काळजीपूर्वक उपाय योजना आखलेली नाही. त्यामुळे जर सांडपाणी या झऱ्यातून वाहू लागले तर त्याचे विपरीत परिणाम परिसरातील जनतेला भोगावे लागतील, अशी भीती भास्कर नारुलकर यांनी व्यक्त केले.