पणजी: बस्तोडा येथे ‘रोडरेज’वरुन एका गरोदर महिलेसह तिच्या पतीला जबर मारहाण झाल्याच्या तक्रारीवरून म्हापसा पोलिसांनी या प्रकरणात अटक केलेल्या तिघांनी मुंबई उच्च न्यायालयाच्या गोवा खंडपीठात जामिनासाठी अर्ज केला होता. त्या तिघांच्या अर्जावरील सुनावणी आज पूर्ण होऊन त्यावरील निर्णय राखून ठेवण्यात आला. या प्रकरणातील मुख्य सूत्रधार अजूनही फरारी असल्याने जामिनाला पोलिसांच्या सरकारी वकिलांनी जोरदार विरोध केला.

या हल्ल्याप्रकरणी पोलिसांनी पिराझोन-मयडे येथील रंगनाथ शेट्ये (५५), विनोद शेटकर (४७) व कौशल शेट्ये (३२) या तिघांना अटक केली असून इतर संशयित अजूनही फरारी आहेत. संशयितांनी हल्ल्यासाठी वापरलेली दोन चारचाकी वाहने पोलिसांनी जप्त केली.

फिर्यादी याप्रकरणी पीडित कुटुंबीयांनी संशयितांपैकी तुळशीदास, कार्तिक व रुत्विक अशा तिघांची नावे पोलिसांना दिली आहेत त्यानुसार, त्यांचा शोध पोलिस घेत आहेत. जखमी महिला ही गरोदर होती त्यामुळे हा हल्ला गंभीर होता.

पोलिसांनी अटक केलेले संशयित सध्या न्यायालयीन कोठडीत आहेत. पोलिस चौकशीवेळी त्यानी तपासकामात सहाकार्य केले आहे. त्यांची कोठडी संपून न्यायालयीन कोठडीत असल्याने ते पोलिसांसाठी चौकशीसाठी नको आहेत.

न्यायालयीन कोठडीत ठेवून काहीच उपयोग होणार नाही. ते गोमंतकीय असल्याने फरारी होण्याची शक्यता नाही. त्याना जामीन दिल्यास दिलेल्या शर्थींचे पालन करण्यात येईल. साक्षीदारांना धमकावण्याची शक्यता नाही, त्यामुळे जामीन देण्याचा युक्तिवाद करण्यात आला.