कळंगुट: बार्देश येथील एका उच्च माध्यमिक विद्यालयात धक्कादायक प्रकार समोर आला असून, १७ वर्षीय विद्यार्थिनीला मानसिक छळ केल्याप्रकरणी एका शिक्षिकेविरुद्ध पोलिसांनी गुन्हा दाखल केला आहे. या घटनेमुळे पालक तसेच विद्यार्थ्यांमध्ये चिंतेचे वातावरण निर्माण झाले आहे.

मुलीच्या पालकांनी दिलेल्या तक्रारीनुसार, २६ सप्टेंबर रोजी दुपारी सुमारे १:३० वाजण्याच्या सुमारास शिक्षिकेने संबंधित विद्यार्थिनीचा शाळेत अपमान केला. शिक्षिकेने मुलीच्या वैयक्तिक संबंधांबाबत खोटे आरोप केला, तसंच शाळेच्या परिसरात मोबाईल फोन वापरल्याचा आरोप करत तिची प्रतिमा मलिन केली.

या प्रकारामुळे विद्यार्थिनी मानसिकरीत्या पूर्णपणे खचली असून तिला सतत तणाव आणि भावनिक आघाताचा सामना करावा लागत आहे. मानसिक अस्थिरतेमुळे तिने सध्या शिक्षणालाही विराम दिला असून ती उपचार घेत आहे. कुटुंबीयांनी याबाबत तीव्र नाराजी व्यक्त केलीय.

तक्रारीवर कारवाई करत साळगाव पोलिसांनी संबंधित शिक्षिकेविरुद्ध गोवा बाल कायदा कलम ८ तसेच बाल न्याय कायदा कलम ७५ अंतर्गत १४ नोव्हेंबर रोजी गुन्हा दाखल केला आहे.

या संपूर्ण प्रकरणाचा तपास पोलीस निरीक्षक मिलिंद भुईंबर यांच्या देखरेखीखाली सुरू असून पीएसआय सर्वेश भंडारी पुढील तपास करत आहेत. घटनेबाबत पुढील तपासानंतर शिक्षिकेवर कठोर कारवाई होण्याची शक्यता व्यक्त केली जात आहे.