फोंडा: बांदोडा पंचायत क्षेत्रातील एका गरजू कुटुंबाच्या घरी विजेचा दिवा लागला आणि या कुटुंबातील पती पत्नी गहिवरले. पती-पत्नी आणि एक छोटीशी मुलगी असे हे कुटुंब आहे. माधवराव ढवळीकर ट्रस्टच्या सहकार्याने पेशाने मोटारसायकल पायलट असलेल्या मोहन गावडे यांच्या घरी सोलरचा हा दिवा पेटला आणि गेला बराच काळ विजेच्या प्रतीक्षेत असलेल्या गावडे कुटुंबीयांचे घर प्रकाशमान झाले.

बांदोडा पंचायत क्षेत्रातील फर्मागुढी परिसरात असलेल्या या गावडे कुटुंबाने छोटेसे घर बांधले आहे. मात्र, काही कारणास्तव या घराला वीज खात्यातर्फे वीज कनेक्शन देण्यास अडचणी निर्माण झाल्या.

मात्र वीजमंत्री सुदिन ढवळीकर यांनी सुवर्णमध्य साधत सोलर एनर्जीद्वारे या कुटुंबाला वीज कनेक्शन दिले त्यासाठी माधवराव ढवळीकर ट्रस्टचे विश्वात युवा नेता मिथिल ढवळीकर यांच्याकडे प्रस्ताव मांडल्यानंतर लगेच मंजुरी देण्यात आली आणि अखेर गावडे कुटुंबाचे घर उजळले. वीजमंत्री सुदिन ढवळीकर यांनी गावडे कुटुंबाला शुभेच्छा देताना ट्रस्टकडून हा अशा प्रकारचा पहिलाच समाजोपयोगी उपक्रम असल्याचे नमूद केले.

समाजोपयोगी उपक्रम

सोलर पॅनल बसवून एखाद्या ट्रस्टच्या सहकार्याने आर्थिक मदत करून गरीब गरजूचे घर प्रकाशमान करण्याचा हा पहिलाच उपक्रम असल्याचे सरपंच रामचंद्र नाईक यांनी पत्रकारांना सांगितले. असे अनेक समाजोपयोगी उपक्रम निरंतर माधवराव ढवळीकर ट्रस्टकडून आखले जातात.