Banastarim Bridge Accident: बाणस्तारी अपघातातील मुख्य दोषींनी अटक करा या मागणीसह म्हार्दोळ पोलीस स्टेशनला जमावाने घेराव घातला आहे. विविध सामाजिक कार्यकर्ते यांच्यासह मोठ्या संख्येने गोळा झालेल्या नागरिकांनी पोलीस स्टेशनच्या परिसरात गर्दी केली आहे.

महिलेला अटक करा या मागणीसाठी जमावाने पोलीस उपअधीक्षक आशिष शिरोडकर यांना घेराव घातला. पोलीस महिलेचा बचाव करत असल्याचे म्हणत जमावाने पोलीस ठाण्यातच ठिय्या मांडला आहे.

संतप्त जमावाने पोलीस उपअधीक्षक आशिष शिरोडकर यांच्या चर्चा केली. दरम्यान, यावेळी पोलीस ठाण्यात मोठा गोंधळ पाहायला मिळाला.

मर्सिडीजमधील त्या महिलेला ताबडतोब अटक करा, अशी मागणी जमावाने केली आहे. तर, पोलीस लोकांकडे पुराव्याची मागणी करत आहेत. यामुळे म्हार्दोळ पोलीस स्टेशन परिसरातील वातावरण तंग झाले आहे. पोलीस महिलेचा बचाव करत असल्याचा लोकांनी आरोप केला आहे.

अद्याप पोलीस ठाण्यात जमावाचा गोंधळ सुरू असल्याची माहिती मिळत आहे.

दरम्यान, अपघातावेळी कार नक्की कोण चालवत होते हा तिढा कायम आहे. पण, प्रत्यक्षदर्शी दिग्विजय वेलिंगकर यांनी पोलिसांनी दाखल FIR ला आव्हान दिले असून, अपघातावेळी महिलाच कार चालवत होती असे म्हटले आहे. प्रत्यक्षदर्शीने दाखल केलेल्या तक्रारीमुळे या प्रकरणाला नवे वळण मिळाले आहे.