BalRath Employees Strike: वाढीव वेतनाच्या मागणीसाठी युनायटेड बालरथ कामगार युनियन संघटनेच्या अध्यक्षतेखाली राज्यातील सर्व बालरथ कामगार सोमवारपासून संपावर गेले आहेत. आंदोलनाचा भाग म्हणून राजधानीतील आझाद मैदानावर या कामगारांनी ठिय्या मांडला. दरम्यान या संपामुळे राज्यभरातील विद्यार्थ्यांची गैरसोय झाली.

शिक्षण संचालनालयाने वाढवलेले वेतन कामगार संघटनेला नामंजूर आहे. संपाच्या निर्णयावर कामगार ठाम आहेत, असे युनायटेड बालरथ कामगार युनियन संघटनेच्या नेत्या स्वाती केरकर यांनी सांगितले.

बसचालकांना दरमहा ११ हजार आणि क्लिनरना ५ हजार ५०० रुपये वेतन दिले जात होते. त्याऐवजी चालकांना किमान २० हजार आणि क्लिनरला १४ हजार ५०० रुपये दिले जावेत, अशी मागणी संघटनेची आहे. दरम्यान, शिक्षण संचालनालयाने चालकांना १२ हजार व क्लिनरना ६ हजार रुपये देण्याचे मंजूर केले आहे, परंतु ही वाढ संघटनेने फेटाळली आहे.

संपात ४८० कामगार

या संपात राज्यातील ४२० बालरथांवरील चालक-क्लिनर असे ८४० कामगार सहभागी झाले आहेत. बालरथ कामगार संघटनेने पुकारलेल्या संपाची नोटीस शिक्षण खात्यासह शिक्षण संस्थांना दिली आहे.