CM Pramod Sawant on Balrath Accident at Balli: बाळ्ळी येथे झालेल्या बालरथ स्कूल बस अपघातप्रकरणी वाहतूक पोलिस, सार्वजनिक बांधकाम खाते आणि शिक्षण खाते यांना सविस्तर चौकशीचे आदेश दिले आहेत अशी माहिती, मुख्यमंत्री डॉ. प्रमोद सावंत यांनी दिली.

दरम्यान, या बसमध्ये एकू 34 विद्यार्थी होते. बसमधील 17 मुलांना दक्षिण गोवा जिल्हा रूग्णालयात उपचारासाठी दाखल करण्यात आले आहे. दोघा विद्यार्थ्यांच्या डोक्याला दुखापत झाली आहे. त्यांना देखरेखीखाली ठेवण्यात आले आहे.

या अपघातात एकूण चार विद्यार्थी जखमी झाले आहेत. चालकाचे गाडीवरील नियंत्रण सुटून हा अपघात झाला. या अपघाताचा व्हिडिओ देखील सोशल मीडियात व्हायरल झाला आहे.

या अपघाताबाबत बोलताना मुख्यमंत्री सावंत म्हणाले की, ट्राफिक, पीडब्ल्यूडी आणि शिक्षण खात्यांना या अपघाताची सविस्तर चौकशी करण्याचे आदेश दिले आहेत. अपघातातील जखमी विद्यार्थ्यांना आवश्यक ते सर्व उपचार केले जातील.

या बसेसमध्ये किती विद्यार्थी असावेत याची काही मर्यादा आहे. पण शाळा व्यवस्थापन याकडे लक्ष देत नाही. आम्ही त्यांना निधी देतो. अशा घटना टाळण्यासाठी धोरण तयार करू.

हा अपघात दुर्दैवी आहे. मी सविस्तर अहवाल मागवला आहे. आम्ही बाल रथ बसेसची नियमित देखभाल व्हावी यासाठी निधी देतो. शाळा व्यवस्थापनाने बस सुस्थितीत असल्याची खात्री करून घेतली पाहिजे, असेही ते म्हणाले.

आमदार डिकॉस्टा यांची टीका...

केपेचे आमदार आल्टन डिकॉस्टा म्हणाले, बालरथ बसेसचे ऑडिट होणे गरजेचे आहे. हा मुद्दा आम्ही विधानसभेत उपस्थित केला होता. पण सरकारने त्यावर काहीही केलेले नाही. आता तरी हा मुद्दा गांभीर्याने घेतला जावा. लहान मुलांच्या आरोग्याशी खेळ होता कामा नये.