पणजी: मंत्री बाबुश मोन्सेरात यांच्याविरुद्धच्या कथित बलात्कार प्रकरणाचा खटला न्यायालयात आहे. आज सुनावणीवेळी पीडित महिला तिच्या साक्षीसाठी न्यायालयात हजर न झाल्याने सुनावणी 12 डिसेंबरपर्यंत स्थगित करण्यात आलेली आहे.

(Babush Monserrate Rape Case)

मागील सुनावणीवेळी पीडितेने सरकारी वकिलांना सहाय्य करण्यासाठी तिच्या वकिलांना परवानगी देण्याचा अर्ज आज अतिरिक्त सत्र न्यायालयात दाखल केला होता. या खटल्यावरील सुनावणीवेळी अनुपस्थित राहण्यासाठी संशयित मोन्सेरात यांनी परवानगी घेतल्याने ते मागील सुनावणीवेळी न्यायालयात उपस्थित नव्हते. ही सुनावणी आज 2 डिसेंबरला ठेवण्यात आली होती.

बलात्कारप्रकरणी मोन्सेरात यांच्यामागे ससेमिरा सुरूच

बाबुश मोन्सेरात व रोझारिया ऊर्फ रोझी फेर्रोस या दोघांविरुद्ध बलात्काराच्या आरोपाखाली आरोप निश्‍चित होऊन त्यावरील खटला सुरू झाला आहे. पोलिसांच्या 250 पानी आरोपपत्रात 40 जण साक्षीदार आहेत. या घटनेची तक्रार महिला पोलिस स्थानकात मे 2016 मध्ये नोंद होऊन त्यावेळी मोन्सेरात व फेर्रोस यांना अटक झाली होती. जुलै 2018 मध्ये आरोपपत्र सादर केल्यानंतर जून 2019 मध्ये न्यायालयाने आरोप निश्‍चितीचा आदेश दिला होता.

‘पोलिस स्थानक’ प्रकरणाची सुनावणी

मंत्री बाबुश मोन्सेरात यांच्यासह ३६ जणांविरुद्ध पणजी पोलिस स्थानकावरील हल्लाप्रकरणीची सुनावणी न्यायालयात सुरू झाली आहे. या प्रकरणामध्येही न्यायालयाने संशयितांना सुनावणीवेळी उपस्थित राहण्यास सांगितले असुन, या हल्ल्याची सुनावणी 6 डिसेंबरला आहे.