म्हापसा: वेर्ला येथील आध्या महिला मंडळाच्या अध्यक्ष प्रीती आगरवाडेकर यांच्या पुढाकाराने नाईकवाडा, वेर्ला-म्हापसा येथे भारतीय उत्सव परंपरेच्या महतीबाबत जनजागृती करण्यात आली. प्रमुख पाहुणे म्हणून वालावलकर उच्च माध्यमिकचे माजी प्राचार्य अनिल सामंत उपस्थित होते.

मंडळाच्या सचिव मृणालिनी केरकर यांच्या निवासाच्या प्रांगणात झालेल्या या कार्यक्रमात महिलांतर्फे फुगडी नृत्य, नाट्य दिग्दर्शक रोहिदास जोशी यांच्या संयोजनाखाली नाटिका, तसेच काही खेळांचे सादरीकरण झाले. यानिमित्ताने पाककला स्पर्धाही घेण्यात आली.

सन्माननीय अतिथी म्हणून उज्ज्वला फडके व ब्रह्मकुमारी ममता, ब्रह्मकुमारी गायत्री हिरोजी यांची उपस्थिती होती. यावेळी अनिल सामंत म्हणाले, भारतीय उत्सव परंपरेला फार मोठी महती लाभली आहे व त्या उत्सवांना वैज्ञानिक अधिष्ठानही लाभले आहे. ब्रह्मध्वज, राष्ट्रध्वज आणि आत्मध्वज या तत्त्वांचा पुरस्कार त्या उत्सवांतूनहोत असतो.महिलांवर नेहमीच कामाचा ताणतणाव असतो व त्यांना अभिव्यक्तीसाठी मुक्त व्यासपीठ देण्याच्या हेतूने या कार्यक्रमांचे आयोजन केल्याचे या वेळी प्रीती आगरवाडेकर यांनी स्पष्ट केले.