म्हापसा: म्हापसा डिटेन्शन सेंटरच्या छपराची दुरवस्था झाली आहे. छापरची कौले फुटलेली आहेत. ही कौले दुरुस्त करण्याची मागणी येथील कैद्यांनी केली होती. मात्र, आपल्या मागणीची पूर्तता होत नसल्याने या सेंटरच्या 9 कैद्यांनी गोंधळ घातला. सेंटरचे गेट बंद करून कर्मचार्‍यांना कोंडून ठेवण्याचा प्रयत्न केला. सोमवारी रात्री उशिरापर्यंत या कर्मचार्‍यांची सुटका करण्यात आली नव्हती. (Mapusa Detention Center Latest News)

सोमवारी दुपारपासून हा प्रकार सुरू झाला. कैद्यांनी सेंटरचा आतील दरवाजा (Door) बंद ठेवला होता. संध्याकाळी 7 वा. कर्मचार्‍यांची सेवा समाप्त होते. पण या कैद्यांनी आपला आक्रमक पवित्रा मागे घेतला नाही. त्यामुळे ड्युटीवर जाणारे दुसर्‍या पाळीच्या कर्मचार्‍यांना गेटबाहेरच ताटकळत राहावे लागले.

मिळालेल्या माहितीनुसार, ही घटना सोमवारी दुपारी घडली. म्हापसा (Mapusa) डिटेन्शन सेंटर मधील एका खोलीच्या छपराची कौले फुटली होती. कैद्यांनी खोलीतील कौलांची दुरुस्ती करण्याची मागणी अधिकार्‍यांकडे केली होती. मात्र, ही मागणी पूर्ण झाली नाही. मागणी करणाऱ्या कैद्याने ही घटना आपल्या सहकारी कैद्यांच्या कानावर घातली. सर्व कैद्यांनी अधिकारी व कर्मचार्‍यांना जाब विचारला. वेळेवर औषधोपचार दिले जात नसल्याचा आरोपही त्यांनी केला.