bicholim : भजनाचा गजर आणि अन्य पारंपरिक कार्यक्रमांसह गावकरवाडा-डिचोली येथील श्री शांतादुर्गा देवस्थानात ‘आषाढी एकादशी’ उत्सव साजरा करण्यात आला. श्री शांतादुर्गा देवस्थान ग्रामस्थ गावकर मंडळ ट्रस्टतर्फे हा उत्सव साजरा करण्यात आला.

सकाळी देवीस अभिषेक आदी विधी पार पाडल्यानंतर देवीला लुगडे आणि सुवर्णालंकारांनी सजविण्यात आले. केळीच्या गाभ्यापासून मखर सजावट करण्यात आली होती. ‘आषाढी’निमित्त देवीच्या भक्तगणांनी देवीच्या चरणाकडे आपली सेवा अर्पण केली. सकाळपासून मंदिरात भक्तीमय वातावरण पसरले होते.

दुपारी चार चौगुले ग्रामस्थ गावकर मंडळीकडून समई प्रज्वलित केल्यानंतर चोवीस तासांच्या अखंड भजनी सप्ताहाला प्रारंभ झाला. दुपारपासून मंदिरात भजनाचा गजर घुमत होता. ग्रामस्थ गावकर मंडळाच्या भजनाने सप्ताहाला प्रारंभ झाला. नंतर महिला आणि पुरुष भजनी पथकांतर्फे भजन सादर करण्यात आले.

आज सांगता

शुक्रवारी (ता.३०) दुपारी १२.३० वा. ग्रामस्थ गावकर, भाविक व महिला दिंडी पथकासह श्री विठ्ठलनामाच्या गजराने मंदिराभोवती पाच प्रदक्षिणा घालणार आहेत. मंदिरात आल्यानंतर पुजाऱ्यांकडून देवीस व पंचायतन देवदेवतांना नैवेद्य, आरती, गाऱ्हाणे व तीर्थप्रसाद होणार आहे. रात्री पुराण वाचन, धुपारती आदी विधी झाल्यानंतर भजनी सप्ताहाची सांगता होणार आहे.