आज प्रत्येक क्षेत्रात पुरुषांबरोबर महिलाही पुढे येत आहेत. काही महिला तर आपल्या पतीसोबत काम करताना दिसून येतात. याचा प्रत्यय यंदाही डिचोलीत दिसून येत आहे. पंढरपूरची एक महिला चक्क आपल्या नवऱ्याला चर्मवाद्ये वाद्ये दुरुस्ती करण्याच्या कामात मदत करीत आहे.

चतुर्थीचे वेध लागले, की महाराष्ट्रातील वेगवेगळ्या भागातील तंतू आणि चर्मवाद्ये दुरुस्ती करणारे कारागीर गोव्याची वाट धरतात. पंढरपूर येथील एक कारागीर सुनील धुमाळ हे गेल्या जवळपास एकवीस वर्षांपासून चतुर्थीला महिना-दीड महिना असताना डिचोलीत येऊन चर्मवाद्ये दुरुस्ती करतात. सुनील धुमाळ हे कारागीर यंदाही डिचोलीत आले आहेत. त्यांच्यासमवेत त्यांच्या पत्नी मंदाही आल्या आहेत. बाजारातील जागेत आपला व्यवसाय थाटून सध्या त्यांनी वाद्ये दुरुस्ती करण्यासही सुरवात केली आहे.

चतुर्थी म्हटली, की भजन, आरत्या आल्याच. त्यासाठी प्रामुख्याने तबला, पखवाज, समेळ आदी चर्मवाद्यांची आवश्यकता असते. चतुर्थीपुर्वी ही वाद्ये दुरुस्त करण्यासाठी गणेशभक्तांची लगबग सुरु असते. आणि मग ते वाद्ये दुरुस्त करणाऱ्या कारागिरांच्या शोधात असतात. सुनील धुमाळ हे कारागीर ही वाद्ये दुरुस्त करण्यात पटाईत आहेत. त्यांच्यासोबत त्यांची पत्नी मंदा आली असून, ती आपले पती सुनील यांना या व्यवसायात मदत करीत असतात. सध्या सुनील धुमाळ यांच्याकडे दुरुस्तीसाठी वाद्ये आली असून, आपल्या पत्नीसमवेत ते दुरुस्तीकामात रमले आहेत.

वाद्ये दुरुस्ती करण्याचे मी प्रशिक्षण घेतलेले नाही. नवऱ्याबरोबर काम करताना अनुभवातून काही गोष्टी शिकून घेतल्या आहेत. पखवाज, डग्ग्याला शाई लावणे, वाद्या ओढणे आदी कामे मला जमतात. गेल्या अठरा वर्षांपासून मी नवऱ्यासोबत येत आहे. नवऱ्याला जमेल, ती सर्व मदत करते. मालकही आम्हीच आणि गडीही आम्हीच. विघ्नहर्त्या गणरायाच्या कृपेने गणेशभक्तांकडून चांगला प्रतिसाद मिळतो.

- मंदा धुमाळ, कारागीर