Goa CM Pramod Sawant

गोव्याचे माजी राज्यपाल सत्यपाल मलिक यांनी कोरोना काळात राज्यात भ्रष्टाचार झाल्याचा आरोप एका मुलाखतीत केला होता. हा व्हिडिओ प्रसिद्ध करत मुख्यमंत्री सावंत यांना अटक करण्याची मागणी काँग्रेसने केली होती.

दरम्यान, आता दिल्लीच्या कथित मद्य घोटाळ्याप्रकरणी भंडारी समाजातील नेत्यांची ईडीकडून चौकशी झाल्यानंतर, आपने हाच भ्रष्टाचाराचा मुद्दा उपस्थित करत मुख्यमंत्री सावंत यांच्यासह त्यांच्या पत्नीला अटक करण्याची मागणी केलीय.

तसेच, ईडीची चौकशी ही निव्वळ भंडारी समाजाची सतावणूक करण्याचे कारस्थान असल्याचा आरोप आपने केला.

गोव्यातील आप नेते राजेश कळंगुटकर आणि उपाध्यक्ष वाल्मिकी नाईक यांनी पत्रकार परिषद घेत भाजप सरकार आणि मुख्यमंत्री सावंत यांच्यावर टीका केली.

'गोव्यात गुरुवारी (दि.28 मार्च) चार जणांची झालेली ईडीची चौकशी ही निव्वळ भंडारी समाजाची सतावणूक करण्याचे कारस्थान आहे. भंडारी समाज हा गरीब व कष्टाळू आहे कुणीही या समाजाला गृहित धरू नये नाहीतर हा समाज मोठ्या मोठ्या प्रस्थापितांना स्वाहा करेल असा,' इशारा आप नेते राजेश कळंगुटकर यांनी दिला.

'केवळ विधानाच्या आधारावर दिल्लीच्या मुख्यमंत्र्यांना अटक होऊ शकते तर गोव्याचे माजी राज्यपाल सत्यपाल मलिक यांनी केलेल्या विधानावरून मुख्यमंत्री डॉ. प्रमोद सावंत आणि त्यांच्या पत्नी सुलक्षणा सावंत यांना अटक करावी,' अशी मागणी आपचे उपाध्यक्ष वाल्मिकी नाईक यांनी पत्रकार परिषदेत केली.

दिल्ली मद्य धोरण कथित घोटाळा आणि ईडीची चौकशी

दिल्लीतील मद्य धोरणातील कथित घोटाळ्याप्रकरणी मुख्यमंत्री अरविंद केजरीवाल यांना अटक करण्यात आली आहे. मद्य घोटाळ्यातील पैसा गोवा विधानसभा निवडणुकीच्या प्रचारात वापरण्यात आल्याचा आरोप ईडीने केला आहे.

याप्रकरणी गुरुवारी ईडीने आपचे गोवा संयोजक अमित पालेकर, रामराव वाघ, दत्तप्रसाद नाईक आणि भंडारी समाजाचे अध्यक्ष अशोक नाईक यांची चौकशी केली. यानंतर राज्यातील भंडारी समाजाचे नेते आक्रमक झाले आहेत.

काँग्रेसने केली होती सावंत यांच्या अटकेची मागणी

अरविंद केजरीवाल यांच्या अटकेनंतर काँग्रेसने माजी राज्यपाल सत्यपाल मलिक यांच्या आरोपांचा संदर्भ देत मुख्यमंत्री सावंत यांच्या अटकेची मागणी केली आहे.