पणजी: अग्निकांडानंतर चर्चेत आलेल्या हडफडे येथील ‘बर्च बाय रोमिओ लेन क्लब’मध्ये कोण कोण अधिकारी यापूर्वी जाऊन आले, याची माहिती मुख्यमंत्री डॉ. प्रमोद सावंत यांच्यापर्यंत कशी पोचली, याचीच चर्चा सध्या प्रशासनात आहे. दोन दिवसांपूर्वी मुख्यमंत्र्यांनी याचा उल्लेख केला होता. या क्लबमध्ये गेलेल्यांनी तेथे आपत्कालीन दरवाजा नसल्याची बाब हेरली असती तर पुढील दुर्घटना टाळता आली असती, असे मुख्यमंत्री म्हणाले.

तेथे कोण कोण जाऊन आले, याचे पुरावे आपल्याकडे असल्याचे मुख्यमंत्र्यांनी त्याचवेळी बोलण्याच्या ओघात सांगून टाकले. त्यामुळे किनारी भागात पार्ट्या करणारे धास्तावले आहेत. मुख्यमंत्र्यांकडे कोणाची छायाचित्रे व व्हिडिओ असतील, याचा अंदाज घेण्याचा प्रयत्न शुक्रवारी काहीजण करत होते. मुख्यमंत्री कार्यालयातून काही मिळते का यासाठी प्रयत्न करावेत, यासाठी धास्तावलेले काहीजण पत्रकारांना विनंती करत होते.

अधिकाऱ्यांची उडाली झोप

एका परिषदेच्या निमित्ताने मुख्यमंत्री हे बोलले असले तरी त्याची धास्ती अनेकांनी घेतली आहे. कोणा कोणाविषयी पुरावे मुख्यमंत्र्यांकडे कोणी पोचवले असतील, याचाही अंदाज असे घाबरलेले अधिकारी लावू लागले आहेत. आणखी क्लबची अनियमितता पुढे आली, उच्च न्यायालयातील खटल्यातून आणखी काही माहिती समोर आली तर आपली पार्टी चर्चेत येईल का, अशी भीती त्यांना सतावू लागली आहे.

अनियमिततेवरही नजर हवी

मुख्यमंत्री आणि मुख्य सचिव यांनाच अशा विषयात लक्ष घालून प्रमाणित कार्यपद्धती ठरवावी लागते. अशी पद्धती असावी, असा विचार तेथे भेट दिलेल्या अधिकाऱ्यांच्या मनात का आला नाही, असा सवालही मुख्यमंत्र्यांनी विचारला आहे. क्लबमध्ये जाण्यात काही गैर नाही. मात्र, तेथील अनियमिततेवरही नजर हवी, असे त्यांनी सुचविले आहे.