पणजी: ‘लेक्स इन्फिनेटम-2022’ स्पर्धेच्या मध्यस्थता या प्रकारात पहिले स्थान एपीआयआयटी श्रीलंका (टी-16) या संघाला प्राप्त झाले. दुसरे स्थान ओपी जिंदाल (टी-26), या संघाला प्राप्त झाले.तर वाटाघाटी प्रकारातील पहिले स्थान एन.यू.एस. सिंगापूर (टी-13) यांना तर दुसरे स्थान एन.एल.यू. जोधपूर एम-01) यांना प्राप्त झाले. डॉ.एमआरके प्रसाद प्रोत्साहन पुरस्कार वाटाघाटी या प्रकारात लाभला.

साळगावकर कायदा महाविद्यालयातर्फे ‘आंतरराष्ट्रीय विवाद निराकरण स्पर्धा' यशस्वीरीत्या पार पडली. जगभरातील कायद्याच्या विद्यार्थ्यांना मध्यस्थी आणि वाटाघाटी कौशल्ये दाखवण्यासाठी संधी तसेच प्रोत्साहित करण्यासाठी ही स्पर्धा आयोजित केली जाते. झूम प्लॅटफॉर्मद्वारे आभासी पद्धतीने झालेल्या या स्पर्धेत एकूण 28 महाविद्यालये 8 आंतरराष्ट्रीय संस्था आणि 20 राष्ट्रीय संस्थांनी सहभाग घेतला होता.

उद्‍घाटन कार्यक्रमाला न्यायमूर्ती मनीष पितळे, 'ए.आय.डी.आर' चे प्रतिनिधी कॅथरीन डेव्हिडसन, 'लेक्स इन्फिनेटम' च्या संचालक पर्ल मॉन्तेरो व साळगावकर कॉलेजचे प्राचार्य डॉ. जी. शबीर अली आदी मान्यवर उपस्थित होते.

'लेक्स इन्फिनिटम 2022'' अंतर्गत 19 ते 21 फेब्रुवारीपर्यंत विविध ज्ञानवर्धक आणि चिंतनशील सत्रांचे आयोजन करण्यात आले होते. यामध्ये किंबर्ली श्रायबर, मॅंडीस, ग्रेगरी बॉंड, थॉमस व्हेलिंटने, कॅथरीन डेव्हीडसन आणि चार्ल ला फॉंन्ड यांनी विविध विषयांवर सहभागीना मार्गदर्शन केले.

समारोप समारंभात प्रमुख पाहुणे म्हणून न्यायमूर्ती महेश सोनक उपस्थित होते.आभासी पद्धतीने या स्पर्धेचा बक्षीस वितरण समारंभ पार पडला. प्रा. पर्ल मॉन्तेरो यांनी आभार मानले.