पणजी: हणजूण व हडफडेमध्ये अन्न व औषध प्रशासनाच्या पथकाने गुरुवारी सायंकाळी १८ रेस्टॉरन्ट आणि फास्टफूड आस्थापनांची तपासणी केली. यामध्ये ९ आस्थापनांच्या मालकांनी स्वच्छता आणि एफडीएच्या नियमांचे उल्लंघन केल्यामुळे त्या आस्थापनांना टाळे ठोकण्याचे निर्देश प्रशासन संचालक श्वेता देसाई दिले आहेत.

एफडीच्या संचालिका श्‍वेता देसाई यांच्या मार्गदर्शनाखाली उत्तर गोवा अधिकारी रिचर्ड नोरोन्हा, अन्न सुरक्षा अधिकारी अमीत मांद्रेकर, लेनीन डिसा व इतरांनी ही कारवाई केली. सध्या एफडीएने किनारपट्टीतील अन्न गुणवत्ता आणि स्वच्छतेची तपासणीची मोहीम सुरू केली आहे. गुरुवारी सायंकाळी अन्न व औषधे प्रशासनाच्या पथकाने हडफडे आणि हणजूणमध्ये स्वच्छता निरीक्षण मोहीम राबवली.

उडपी रेस्टॉरन्ट, बिर्याणी, फास्टफूड व खाद्यपदार्थ विक्री आस्थापनांची पणजी तपासणी केली. एकूण १८ आस्थापनांचा यामध्ये समावेश होता. त्यातील ९ मध्ये नियमांचे पालन केले नसल्याचे आढळून आले. त्यामुळे संबंधित आस्थापने बंद करण्याचा आदेश देसाई यांनी दिले.

हणजुणे येथील राइस बाउल रेस्टॉरंट, टेस्ट ऑफ इंडिया एनआर स्टारको जंक्शन, दम हैदराबादी बिर्याणी रेस्टॉरंट, अन्नपूर्णा रेस्टॉरंट आणि फास्ट फूड, चेन्नई मुरुगन रेस्टॉरंट, दिशांत कॅफे, अफलातून रेस्टॉरंट, नम्मा दक्षिण, बनारसी पाणीपुरी फूड कार्ट, जय गणेश जनरल स्टोअर्स, कैलाश जनरल स्टोअर्स, अंजुना २१ रेस्टॉरंट, तर हडफडे येथील एबीआर रेस्टॉरंट, हैदराबादी दम बिर्याणी रेस्टॉरंट, जय माताजी सुपर मार्केट, राठोड जनरल स्टोअर्स, मुनिराज स्वीट मार्ट यांचा समावेश आहे.