Amit Patkar Claims Congress Members Spreading False Information

पणजी: तीन दिवसांच्या गोवा दौऱ्यावर आलेले काँग्रेसचे प्रभारी माणिकराव ठाकरे यांच्यासोबत विविध मतदारसंघातील पक्षाच्या गटसमित्यांच्या बैठका घेऊन पक्ष बांधणीचे काम पुढे नेणाऱ्या अमित पाटकरांची खुर्ची आणखी मजबूत होणार आहे. ठाकरे यांनी पाटकरांच्या कामाचे कौतुकच केले नाहीतर अंतर्गत कलहाची देखील दखल घेतली.

आपल्याच पक्षातील लोक चुकीची माहिती पोहोचवतायेत

अमित पाटकर यांनी रविवारी (9 मार्च) 'गोमन्तक'शी बोलताना गोवा प्रभारी ठाकरे आणि पाटकर यांच्यात दरी निर्माण झाल्याच्या वृत्ताचे खंडन केले होते. त्याशिवाय, प्रसारमाध्यमांकडे आपल्याच पक्षातील लोक चुकीची माहिती पोहोचवत असल्याचे ते म्हणाले. गेल्या काही दिवसांपासून पक्षात काही अलबेल नाही असं सांगण्यात आलं. राज्य नेतृत्वात छुपा संघर्ष आसल्याचं देखील सांगण्यात आलं. मात्र आमचं सगळं काही ठीक सुरु आहे, असं म्हणत पाटकर यांनी या अफवांना पूर्णविराम दिला.

ठाकरे यांचा गोवा दौरा

ठाकरे गोव्यात (Goa) असताना हा सर्व प्रकार घडल्याने त्यांना या वृत्ताची आणि घडत असलेल्या घटनांची दखल घ्यावी लागली. ठाकरे यांनी आपल्या दौऱ्यात गोव्यातील चार मतदारसंपातील गटसमित्यांच्या बैठका घेतल्या आणि पक्ष बांधणीविषयी, त्याचबरोबर गटसमितीच्या कार्याची माहिती जाणून घेतली. याशिवाय, आगामी विधानसभा निवडणुकीच्या दृष्टीने त्यांनी मार्गदर्शनही केले. प्रदेशाध्यक्ष अमित पाटकर यांच्या मार्गदर्शनाखाली राज्यातील सर्व (40) विधानसभा मतदारसंघात पक्ष संघटना मजबूत करण्याचे काम सुरु असल्याचे देखील ते यावेळी सांगायला विसरले नाहीत.