पणजी : स्वातंत्र्य लढ्यात आणि स्वातंत्र्योत्तर राष्ट्र उभारणीत काँग्रेस पक्षाने दिलेले योगदान सर्वांना माहीत आहे. तिरंगा हा आमच्या हृदयात आहे. काँग्रेसने जनतेला तिरंगा फडकवू नका, असा जो भाजपचे प्रदेशाध्यक्ष सदानंद शेट तानावडे यांनी आरोप केला आहे, तो त्यांनी सिद्ध करावा. अन्यथा गोमंतकीय जनतेची माफी मागावी, असे आव्हान काँग्रेसचे माध्यम विभाग प्रमुख अमरनाथ पणजीकर यांनी दिले.

काँग्रेस भवनात झालेल्या या पत्रकार परिषदेस प्रदेश युवक काँग्रेसचे अध्यक्ष ॲड. वरद म्हार्दोळकर, महिला काँग्रेसच्या अध्यक्ष बीना नाईक आणि एनएसयूआय अध्यक्ष नौशाद चौधरी यांची उपस्थिती होती.

पणजीकर म्हणाले की, तिरंग्याचा अनादर करणाऱ्या अनेक भाजप नेत्यांचे व कार्यकर्त्यांचे व्हिडिओ सामायिक केले आहेत, त्यातून भाजपची बेगडी देशभक्ती दिसून येते.

पणजीत पदपथ अडवून कसिनोंकडून उभारलेल्या बेकायदेशीर कमानीकडे सरकार डोळेझाक कशी करू शकते? असा सवाल युवक काँग्रेसचे अध्यक्ष ॲड. वरद म्हार्दोळकर यांनी केला.

तूरडाळ आणि साखरेची नासाडी केल्याप्रकरणी माजी नागरी पुरवठा मंत्री गोविंद गावडे यांनी राजीनामा द्यावा, अशी मागणी अमरनाथ पणजीकर यांनी केली. तूरडाळ आयात करून क्रोनी भांडवलदारांना पैसे कमविण्याच्या सोयीसाठी जाणूनबुजून तूरडाळ वाया घालवल्याचा आरोपही त्यांनी केला.