Fuel Leak Issue: व्हडलेभाट, चिखली-दाबोळी परिसरात झुआरी इंडियन ऑईल कंपनीच्या भूमिगत इंधनवाहिनीला गळती लागलेले ठिकाण अखेर सापडले. आल्त-दाबोळी येथील वालिस जंक्शनसमोरील इंधनवाहिनीला भेगा पडल्यामुळे इंधन गळती होत असल्याची माहिती कंपनीचे मुख्य कार्यकारी अधिकारी श्रीप्रसाद नाईक यांनी दिली.

तब्‍बल 16 दिवसांनंतर ठिकाण सापडले, असे कंपनीतर्फे सांगण्‍यात आले. दरम्‍यान, गळतीच्‍या ठिकाणावरून इंधनाची चोरी होत होती का, याचे उत्तर अद्याप सापडलेले नाही.

झुआरी इंडियन ऑईल कंपनीच्या कारभारावर अजूनही ग्रामस्‍थ नाराज आहेत. आल्‍त दाबोळी पठारावर वालिस जंक्शनपेक्षा व्हडलेभाट-चिखली हा भाग खाली आहे.

इंधनाला गळती लागली असती तर ते व्हडलेभाट-चिखली येथे कसे पोहोचले? या प्रश्‍‍नाचे उत्तर कंपनीकडे नाही.

भूमिगत इंधन गळतीचे ठिकाण सापडल्याचे कळताच मुरगावचे उपजिल्हाधिकारी तथा मुरगाव आपत्कालीन व्यवस्थापन समितीचे प्रमुख भगवंत करमली, मामलेदार प्रवीणजय पंडित घटनास्थळी दाखल झाले. यावेळी तेथे अग्निशमन दलाचे अधिकारी दिलीप बिचोलकर व जवान उपस्थित होते.