पणजी: गोव्यात सध्या विधानसभा निवडणुकीचे वातावरण आहे. सर्वच पक्षांचा जोरदार प्रचार सुरू आहे. यातच अनेक नेते तिकीट मिळवण्यासाठी पक्षांतराचा मार्ग अवलंबत आहेत. परिणामी पक्षाशी एकनिष्ठ असलेले नेते नाराजी नाट्य करत आहेत. प्रवीण आर्लेकर (Pravin Arlekar) यांनी नुकताच भाजपमध्ये प्रवेश केला आहे, यावर उपमुख्यमंत्री मनोहर आजगावकर (Manohar Ajgaonkar) यांनी नाराजी व्यक्त केली.

आगामी निवडणुकीसाठी भाजपचे (BJP) तिकीट नाकारले जाण्याची शक्यता असलेले उपमुख्यमंत्री मनोहर आजगावकर यांनी सोमवारी भाजपवरच निशाणा साधला. ते म्हणाले, "मी राज्यात भाजपला बळकट करण्यासाठी मदत केली असली तरी, सरकारने जाहीर केलेल्या 10,000 नोकऱ्यांपैकी मला कोणतीही नोकरी मिळालेली नाही."

आर्लेकर यांना पेडणे (Pernem) मतदारसंघातून भाजपचे तिकीट मिळण्याची शक्यता आहे. "भाजपचे प्रदेशाध्यक्ष सदानंद शेट तानावडे यांनी मला सांगितले की आर्लेकर यांचे वडील चरस विकायचे... ते (आर्लेकर) ड्रग्ज विकायचे आणि आज त्यांनी भाजपमध्ये प्रवेश केला," असे आजगावकर म्हणाले. आजगावकर यांनी मुख्यमंत्री प्रमोद सावंत (Pramod Sawant) यांच्यावर देखील टीका केली. ते म्हणाले, "मुख्यमंत्री प्रमोद सावंत हे बहुजन समाजाचे नेते आहेत, असे मी लोकांना सांगायचे, पण आता त्यांनी 10,000 सरकारी जागा भरल्यानंतरच ते बहुजन समाजाचे नेते असल्याचे मी मान्य करेन."