पणजी, केपे मामलेदार कार्यालय बाजार संकुल इमारतीत हलवल्यास तेथे नवी इमारत बांधता येईल. त्या शक्यतेचा विचार सरकार करेल, असे आश्वासन मुख्यमंत्री डॉ. प्रमोद सावंत यांनी दिले.

केपेचे आमदार एल्टन डिकॉस्ता यांनी विधानसभेत शून्य तासाला हा विषय उपस्थित केला होता. डिकॉस्ता यांनी मामलेदार कार्यालय इमारतीच्या छताच्या कॉंक्रिटचे तुकडे पडू लागल्याकडे सरकारचे लक्ष वेधले. त्यावर मुख्यमंत्र्यांनी हा तोडगा सुचवला.

मांद्रेचे आमदार जीत आरोलकर यांनी विठ्ठलदासवाडा-मोरजी येथे दोन होड्या काल जाळल्या गेल्याकडे लक्ष वेधले. त्यावर पोलिस चौकशी करतील, असे आश्वासन मुख्यमंत्र्यांनी दिले. डिचोलीचे आमदार चंद्रकांत शेट्ये म्हणाले, गोव्यातील वाढत्या चोरीच्या घटनांमुळे डिचोलीतील लोकांच्या मनात भीती आणि चिंतेचे वातावरण आहे. काल डिचोलीत २ मंदिरांत चोऱ्या झाल्या. गोव्यातील धार्मिक स्थळांना लक्ष्य करून या वाढत्या चोऱ्या, प्रतिबंधात्मक उपायांनी थांबवाव्यात.

सांतआंद्रेचे आमदार वीरेश बोरकर म्हणाले, सांतआंद्रे मतदारसंघातील विविध ठिकाणचे पथदिवे कार्यान्वित नाहीत. दांडी आगशी, पाळे, गवळी-मौला, सांतान, कुडका, बाती, गोवा वेल्हा यासारख्या ठिकाणचे पथदीप बंद आहेत. यामुळे मतदारसंघातील लोकांना त्रास होत आहे.

त्यांची सेवा नियमित करावी

मुरगावचे आमदार संकल्प आमोणकर म्हणाले, मुरगाव नगरपालिकेतील रोजंदारी/कंत्राटी कामगारांच्या सेवा सरकारच्या अनेक आश्वासनांनंतरही नियमित केल्या जात नाहीत. यातील बहुतांश कामगार १५ वर्षांहून अधिक काळ काम करत आहेत. ते सर्व प्रकारची कामे करतात. त्यांच्या सेवा नियमित करण्याची मागणी आहे. यावर मुख्यमंत्र्यांनी मार्ग काढतो, असे नमूद केले.