पणजी: गोव्यात आता सार्वजनिक बांधकाम विभागाकडून मोबाईल ॲपद्वारे पाणी पुरवठ्याबाबत माहिती दिली जाणार आहे. बांधकाम विभाकडून पिण्याच्या पाण्याच्या बाबतीत एक धोरण निश्चित करण्यात आले असून याअंतर्गत पाणी व्यवस्थापनाचा एकूण आराखडा तयार करण्यात आलाय, यामध्ये पिण्याच्या पाण्याची दुरुस्ती आणि देखभाल इत्यादी घटकांचा समावेश होतो.

नवीन उपाय योजनेअंतर्गत पिण्याच्या पाण्याच्या बाबतीत दुरुस्तीच्या सूचना असल्यास त्या पंचायतींना किंवा नगरपालिकांना मोबाईल ॲपद्वारे दिल्या जातील. पिण्याच्या पाण्याची पाईपलाईन फुटल्यास किंवा आणखीन काही अडचण निर्माण झाल्यास नगरपालिका तसेच ग्रामपंचायतींना एक विशेष टीम तयार करून हा प्रश्न सोडवावा लागेल.

येत्या फेब्रुवारी महिन्यापर्यंत सार्वजनिक बांधकाम विभागाच्या अंतर्गत येणाऱ्या सर्व पाणी पुरवठ्याच्या शाखांना पिण्याच्या पाण्याची व्यवस्था सुधारणारा एक आराखडा बनवून मुख्य अभियंत्यांच्या नजरेस आणून द्यावा लागेल. तसेच आता लवकरच प्रत्येक पंचायत, नगरपालिका आणि पणजी महानगरपालिकेत पाणी पुरवठ्याच्या देखभालीसाठी समित्या स्थापन केल्या जाणार आहेत आणि या समित्यांना नगरविकास संचालनालय तसेच पंचायतींचे सहकार्य मिळेल.

नवीन उपाय योजनेअंतर्गत राज्यातील नगरपालिका आणि पंचायतींना पाण्याच्या तपासणीसाठी किट दिले जातील. पाण्याचा वापर करणाऱ्या सर्व कुटुंबांनी पाण्याचा अपव्यय टाळायचा आहे, तसेच वापरकर्त्यांना नोंदणीकृत टँकरद्वारे पाणीपुरवठा होत असल्याची खात्री करून घ्यावी लागेल.एखाद्या भागात नवीन योजना राबवायची असल्यास सार्वजनिक बांधकाम विभाग नगरपालिका किंवा पंचायतींना सूचना देईल.