मिलिंद म्हाडगुत

फोंडा: राज्यातील पंचायत निवडणूक 4 जूनला होणार असे पूर्वी जाहीर झाले होते आणि त्याप्रमाणे पंचायतीतील अनेक इच्छुक नवरदेव बोहल्यावर चढण्याच्या तयारीला लागले होते. पण, आता या निवडणुका पुढे गेल्यात जमा असल्यामुळे या नवरदेवाच्या उत्साहावर थोडेसे पाणी पडल्यासारखे झाले आहे. सगळ्यांचे लक्ष आता पंचायत निवडणुकीच्या तारखांवर लागले असून तर्कविर्तकांना उधाण यायला लागले आहे. (Goa Panchayat Election News)

फोंडा तालुक्यात एकूण 19पंचायती असून, त्यातील उसगाव गांजे ग्रामपंचायत ही वाळपई मतदारसंघात मोडते. इतर 18 पंचायती या फोंडा तालुक्यातील चार मतदारसंघात मोडत असल्यामुळे चारही आमदारांचे लक्ष या निवडणुकीच्या तारखांवर लागले आहे. अधिक लक्ष केंद्रीत झाले आहे ते आरक्षणावर. एखादा प्रभाग महिलांकरिता राखीव केल्यास आपल्या पत्नीला रिंगणात उतरविण्याची तयारी काही इच्छुक उमेदवारांनी सुरू केली आहे. फोंडा तालुक्यातील चारही मतदारसंघात मंत्री असल्यामुळे या मंत्र्याची ‘मेहेर नजर’ आपल्याकडे वळावी म्हणूनही इच्छुक उमेदवारांकडून प्रयत्न सुरू झाले आहेत. पक्षाच्या चिन्हावर निवडणुका होणार नसल्यातरी आपले खास कार्यकर्ते निवडून यावे या दृष्टीने प्रत्येक मंत्री रणनीती आखताना दिसत आहेत. काही मंत्र्यानी आपले वजन वापरून आपल्या कार्यकर्त्यांना हवे तसे प्रभाग करून दिल्याचे बोलले जात आहे.