म्हापसा: हळदोणा येथे एका व्यक्तीने एका पाळीव कुत्र्याच्या तोंडावर गोळी (एअर गन) झाडली. यात कुत्र्याला गंभीर दुखापत झाली असून त्याच्यावर खासगी रुग्णालयात उपचार सुरू आहेत. स्थानिकांनी या घटनेबद्दल संताप व्यक्त करत दोषींवर कारवाई करण्याची मागणी केली.

श्‍वानमालक विशाल घाडी यांच्या म्हणण्यानुसार, रविवारी सकाळी त्यांच्या ‘कोको'' या पाळीव कुत्र्याच्या तोंडावर एकाने गोळी झाडली. सकाळी ११ ते ११.३० च्या सुमारास गोळीबाराचा आवाज ऐकू आला आणि कुत्रा रक्तबंबाळ अन् जखमी अवस्थेत घरी परतला.

तेव्हा ही घटना उघडकीस आली. कुत्र्याला ताबडतोब खोर्जूवे येथील एंजल्स फॉर अ‍ॅनिमल क्लिनिकमध्ये नेण्यात आले, जिथे डॉक्टरांनी तपासणी केल्यानंतर सांगितले की गोळीमुळे कुत्र्याच्या जबड्यातील हाडे तुटली आहेत, ती फ्रॅक्चर झाली आहेत आणि दातही तुटले आहेत.

दरम्यान, याप्रकरणी, घाडी यांनी उत्तर गोव्यातील ‘सोसायटी फॉर प्रिव्हेन्शन ऑफ क्रुएल्टी टू अनिमल्स’कडे तक्रार दाखल केली आहे.