सासष्टी: श्री रामनाथ देवस्थान, रामनाथी, फोंडा यांच्यातर्फे निर्मित ‘देवा श्री रामनाथा’ या भक्तिगीतांच्या अल्बमचे लोकार्पण मंगळवार 1 मार्च रोजी सकाळी 9 वाजता श्री संस्थान गोकर्ण पर्तगाळी जीवोत्तम मठाधीश श्रीमद् विद्याधीशतीर्थ श्रीपाद वडेर स्वामी महाराज यांच्या मंगल हस्ते लोकार्पण होणार आहे. हा सोहळा श्री रामनाथ देवस्थानात आयोजित करण्यात आला आहे. या अल्बममधील 8 भक्तिगीते भारतातील आठ नामांकित गायक व गायिकांनी गायिली आहेत. त्यात 3 मराठी व 5 कोकणी गीतांचा समावेश आहे. ही सर्व गीते श्री रामनाथ पंचिष्ठ देवतांच्या स्तुतीवर आधारीत आहेत.

मुंबईतील संगीत विश्र्वातील प्रख्यात संगीत संयोजक मिथिलेश पाटणकर यांनी संगीत संयोजन केले आहे. या सर्व गाण्यांचे ध्वनिमुद्रण आजिंबवासन स्टुडिओ (मुंबई) येथील अवधुत वाडकर व नितीन कयारकर, हार्मनी स्टुडिओ मुंबई येथील विवेक कांबळी, ग्रॅविटी स्टुडिओ मुंबई येथील हेमंत पारकर व पुणे येथील डॉन स्टुडिओत करण्यात आले आहे

या अल्बममधील गाणी जागतिक कीर्तीचे गायक महेश काळे, शंकर महादेवन, स्वप्निल बांदोडकर, सुदेश भोसले, राहुल देशपांडे, पद्मश्री सुरेश वाडकर, आर्या आंबेकर व बेला शेंडे यानी आपल्या गोड व भावमधुर आवाजात गायिली आहेत.

या आल्बमचे उद्दीष्ट संगीतातून श्री रामनाथ पंचिष्ठ देवतांची महंती सर्वत्र व्हावी हे आहे. तसेच नव्या पिढीला या देवाचा इतिहास या माध्यमातुन समजावा. हा आल्बम देवस्थान कचेरीत उपलब्ध केला जाईल असे श्री रामनाथ देवस्थान समितीचे अध्यक्ष प्रवास नायक यानी मडगावात घेतलेल्या पत्रकार परिषदेत सांगितले. त्यांच्या समवेत चिटणीस बाजीराव तळावलीकर, खजिनदार मयुर केणी, मुखत्यार राजेंद्र कोसंबे, गीतकार नंदन हेगडे देसाई, संगीतकार यतिन तळावलीकर हे मान्यवर उपस्थित होते.