पणजी: मोठा गाजावाजा करत गोवा क्रीडा प्राधिकरणाच्या कार्यकारी संचालकपदाचा ताबा सोमवारी स्वीकारल्याप्रकरणी मुख्य सचिव डॉ. व्ही. कंदवेलू यांनी बजावलेल्या कारणे दाखवा नोटिशीला डॉ. अजय गावडे यांनी २४ तासांत उत्तर दिले आहे.

‘त्या’ जंगी स्वागत समारंभाशी माझा काडीचाही संबंध नसल्याची भूमिका गावडे यांनी घेतली आहे. समेळ - घुमट यांच्या गजरात पुष्पवृष्टी स्वीकारत डॉ. गावडे हे पदभार स्वीकारण्यासाठी प्राधिकरणाच्या कार्यालयात जात असल्याचा व्हिडिओ व्हायरल झाला. मुख्य सचिव डॉ. व्ही. कंदवेलू यांनी तो पाहिल्यावर त्यांनी कारणे दाखवा नोटीस पाठवून शिस्तभंगाबद्दल कारवाई का करू नये, याचे उत्तर तीन दिवसांत द्यावे, असा आदेश दिला होता.

मुख्य सचिवांनी ज्या तत्परतेने कारणे दाखवा आदेश जारी केला होता तीच तत्परता ते पुढील कारवाई करताना कायम ठेवतील का याकडे प्रशासकीय पातळीवरून लक्ष ठेवण्यात येत आहे. गावडे यांच्यावर या कारवाईला सरकारची मान्यता असणारच. त्यामुळे क्रीडा गावडे यांना संचालकपदी आणताना सरकारच्या मर्जीतील अधिकारी असे गणले जात होते. ती मर्जी आता खप्पा झाली काय अशी चर्चा आज ऐकावयास मिळाली.

...मग दोषी कोण?

मुख्य सचिव कार्यालयात पोचण्याआधीच त्यांच्या टेबलवर गावडे यांनी तीन ओळींत दिलेले नोटीशीचे उत्तर होते. मुख्य सचिवांनी ते पुढील कार्यवाहीसाठी कार्मिक खात्याकडे पाठवले आहे. गावडे यांनी चूक केली नाही तर तेथे त्याचे आयोजन करणाऱ्या, प्राधिकरणाचे प्रशिक्षक आणि इतर या प्रकरणात दोषी आहेत का, असा प्रश्न निर्माण झाला आहे. हे प्रकरण पुढे किती ताणायचे हे सर्वस्वी सरकारवर आता अवलंबून आहे.