Bicholim News : तब्ब्ल 15 दिवसांच्या प्रतीक्षेनंतर मये येथील श्री केळबाई देवीचे मंदिर अखेर खुले करण्यात आले. देवालय प्रशासक तथा डिचोलीचे मामलेदार राजाराम परब यांच्या आदेशानुसार त्यांच्याच उपस्थितीत मंगळवारी दुपारी पोलिस बंदोबस्तात मंदिराचे मुख्य द्वार उघडण्यात आले.

देवस्थानच्या पुजाऱ्याने कुलूप काढले. मुख्य द्वार उघडले असले, तरी गर्भकुड मात्र आज उघडलेली नाही. दार उघडल्यानंतर देवीच्या दर्शनाची ओढ लागलेल्या तमाम भक्तगणांमध्ये उत्साहाचे वातावरण निर्माण झाले आहे.

हा भक्तांच्या संघटितपणाचा विजय आहे, अशा प्रतिक्रिया यावेळी व्यक्त करण्यात आल्या. दुसऱ्या बाजूने पुजारी वगळता भाविकांना पूजा, अभिषेक आदी धार्मिक कार्य करण्यास निर्बंध घातले आहेत.

अन् प्रशासनाला आली जाग

मंदिर बंदप्रश्नी गोमंतक मंदिर महासंघ, परशुराम गोमंतक सेना, बजरंग दल आणि भारतमाता की जय या संघटनांनी रविवारी सभा घेतली होती. 48 तासांत मंदिराचे दार उघडले नाही, तर भाविकांच्या साक्षीने ''कुलूप'' काढण्याचा इशारा त्यांनी दिला होता.

तसेच सोमवारी मामलेदारांना निवेदनही दिले होते. या घडामोडींनंतर सोमवारी सायंकाळीच मामलेदार परब यांनी देवस्थान समितीला ''कारणे दाखवा'' नोटीस जारी करून मंदिर खुले करण्याचे निर्देश दिले होते.

देवीच्या नावाचा जयघोष : मंदिर उघडताच, शेकडो भाविकांनी जयघोष करत देवीचे दर्शन घेतले. यावेळी नाईक गावकर समाजातील लोकांनी दाराला कुलूप कोणी लावले, त्यांचे नाव सांगा, अशी मागणी करून मामलेदारांना घेराव घालण्याचा प्रयत्न केला.

मात्र, मामलेदार परब यांनी लोकांना कडक शब्दांत समज दिली. आपले काही म्हणणे असल्यास दाद मागा, असे त्यांनी भाविकांना सुनावले.