किशोर पेटकर

पणजी, ऑलिंपिकमध्ये भारतीय क्रीडापटूंत गोमंतकीयांचे प्रतिनिधित्व नगण्यच. आता पॅरिस ऑलिंपिकमध्ये तब्बल २८ वर्षांनंतर गोव्यात मूळ असलेली खेळाडू महिलांच्या बॅडमिंटन कोर्टवर झळकणार आहे.

अटलांटा ऑलिंपिकमध्ये १९९६ साली लिअँडर पेस याने टेनिसमधील पुरुष एकेरीत ऐतिहासिक ब्राँझपदक जिंकले होते. गोमंतकीय वंशाचा क्रीडापटू ऑलिंपिकमध्ये खेळण्याची ती अखेरची वेळ होती. पॅरिसमधील स्पर्धेत गोमंतकीय तनिशा क्रास्टो बॅडमिंटनमधील महिला दुहेरीत सहकारी अश्विनी पोन्नाप्पा हिच्यासह पदकासाठी घाम गाळताना दिसेल.

२१ वर्षीय तनिशाचे आई-वडील दक्षिण गोव्यातील सासष्टी तालुक्यातील, पण व्यावसायिक कारणास्तव संयुक्त अरब अमिरातीतील दुबईत स्थायिक झाले.

तनिशाचा जन्म तेथेच झाला, मात्र भारताचे ऑलिंपिकमध्ये प्रतिनिधित्व करण्याच्या ध्येयाने ती मागील सात वर्षांपासून गोव्याकडून खेळत आहे. आता तिची स्वप्नपूर्ती झाली आहे. एकंदरीत तनिशा ऑलिंपिकमध्ये भाग घेणारी २४ वी मूळ गोमंतकीय क्रीडापटू

आहे.

मेरी डिसोझा पहिली महिला

मेरी डिसोझा-सिक्वेरा भारतातर्फे ऑलिंपिक खेळलेली पहिली मूळ गोमंतकीय महिला क्रीडापटू आहे. १९५२ मधील हेलसिंकी ऑलिंपिकमध्ये मेरीने ॲथलेटिक्समधील १०० मीटर आणि २०० मीटर शर्यतीत भाग घेतला. स्वातंत्र्यपूर्व काळात कराची (आता पाकिस्तानात) येथे स्थायिक झालेला हॉकीपटू पीटर पॉल फर्नांडिस भारताकडून ऑलिंपिक खेळलेला (१९३६ बर्लिनमध्ये सुवर्ण) पहिला मूळ गोमंतकीय क्रीडापटू आहे.

पदकविजेते पेस पिता-पुत्र :

अटलांटा ऑलिंपिकमधील ब्राँझपदक विजेता टेनिसपटू लिअँडर याचे वडील डॉ. वेस पेस हे भारताचे माजी हॉकीपटू. वेस पेस संघात असताना भारतीय पुरुष हॉकी संघाने १९७२ मधील म्युनिक ऑलिंपिकमध्ये ब्राँझपदक जिंकले होते. साहजिकच ऑलिंपिक पदकविजेते भारतीय पिता-पुत्र असा विक्रम वेस आणि लिअँडर यांच्या नावे आहे. या कुटुंबाचे मूळ सासष्टीतील असोळणा-वेळ्ळी परिसरात आहे.