Rent A Vehicles: राज्यात मोठ्या प्रमाणात बेकायदा खासगी दुचाकी व चारचाकी वाहने भाडेपट्टीवर देण्याचे प्रकार घडत आहेत. त्याची गंभीर दखल घेत वाहतूक पोलिस विभागाने मंगळवारपासून (21 नोव्हेंबर) पुढील काही दिवस अशा वाहन मालकांविरुद्ध धडक विशेष मोहीम सुरू केली आहे.

ही वाहने जप्त करून कठोर कारवाई केली जाईल, अशी माहिती पोलिस अधीक्षक अक्षत कौशल यांनी दिली. वाहतूक खात्याकडून ‘रेंट ए बाईक’ व ‘रेंट ए कार’साठी परवाना असलेल्या वाहन मालकांनाच ही वाहने भाडेपट्टीवर देण्याचा अधिकार आहे. मात्र सतत सुट्या असल्याने मोठ्या प्रमाणात पर्यटक गोव्यात येत असल्याने काही खासगी वाहन मालक त्यांची वाहने भाडेपट्टीवर देत आहेत. या संदर्भातल्या तक्रारी वाहतूक खाते तसेच वाहतूक पोलिसांकडे आल्या होत्या.

त्यामुळे परवाना असलेल्या वाहन मालकांच्या व्यवसायावर मोठा परिणाम होत होता. त्यामुळे वाहतूक पोलिसांनी अचानक विशेष मोहीम सुरू करून खासगी दुचाकी वा चारचाकी वाहन घेऊन फिरणाऱ्या पर्यटकांचा संशय आल्यास त्यांना अडवून तपासणी सुरू केली आहे.

किमान 2 हजार रुपये दंड

खासगी वाहन भाडेपट्टीवर दिल्यास वाहतूक पोलिस ती जप्त करणार व याचात्याच्याविरुद्ध न्यायालयात पाठविला जातो. मालकाला किमान २ हजार रुपये दंड किंवा त्यापेक्षा अधिक दंड देण्याचा अधिकार न्यायालयाला आहे. या मोहिमेमुळे जे खासगी वाहने भाडेपट्टीवर देत होते त्यांच्यावर लगाम बसला आहे. काहींनी भाडेपट्टीवर दिलेली खासगी वाहने पर्यटकांकडून परत घेण्याचे प्रकार आज घडल्याची माहिती पोलिसांनी दिली.