पेडणे : पोरस्कडे न्हयबाग येथील तेरेखोल नदीत कॅप्टन ऑफ पोर्टने बेकायदा रेती उपसा करणाऱ्या होड्यावर धाड टाकली आहे. या धडक कारवाईत एकूण 26 होड्या जप्त करण्यात आल्या असल्याची माहिती आहे. आज 26 एप्रिल रोजी दुपारी भरारी पथकाने ही कारवाई केली असून त्यामुळे रेती तस्करांचं मात्र धाबं दणाणलं आहे.

बेकायदा वाळू उपसा करणाऱ्या बोटींवर ही कारवाई कॅप्टन ऑफ पोर्टचे उपसंचालक शिरसईकर, भरारी पथकाचे अधिकारी तथा पेडणे मामलेदार अनंत मळीक, पेडणे पोलीस निरीक्षक विक्रम नाईक यांनी संयुक्तरित्या केली आहे. एकाच ठिकाणी न्हयबाग पोरस्कडे येथे एकूण 26 गाड्या जप्त करण्याची ही मोठी घटना मानली जात आहे. जप्त केलेल्या होड्यांपैकी सहा होड्या पाण्यात, तर 20 होड्या वरच्या बाजूने अधिकाऱ्यांना सापडल्या आहेत. या सर्व होड्या जप्त करून पोलिसांच्या स्वाधीन करण्यात आल्या.

तेरेखोल नदीकिनारी ज्या ठिकाणी मोठ्या प्रमाणात रेती उपसा केला जातो असं बोललं जातं, त्याठिकाणी कोणताही रेतीचा साठा आढळून आला नाही. मात्र इतरत्र मोठ्या प्रमाणात होड्या दिसत असूनही त्यावर कोणतीच कारवाई झाली नसल्याने नागरिकांमधून आश्चर्य व्यक्त केलं जात आहे. ही कारवाई केवळ स्टंटबाजी असल्याचाही दावा नागरिकांनी यावेळी केला आहे.

दरम्यान या 26 होडी मालकांपैकी कुणाकडे होड्यांची कागदपत्रे, परवाने आहेत याची तपासणी केली जाईल. असं अधिकाऱ्यांनी स्पष्ट केलं आहे. ज्यावेळी होड्या जप्त केल्या, त्यावेळी एकाही होडीच्या मालकाने होड्या आपल्या असल्याची कागदपत्रे सादर न केल्याने 26 होड्या पोलिसांच्या स्वाधीन केल्याचे अधिकारी शिरसईकर यांनी सांगितलं आहे. यापुढेही अशीच धडक कारवाई सुरु राहील, असा इशाराही त्यांनी यावेळी दिला आहे. फावले आहे.