मडगाव : कायद्याचा उपमर्द केलेल्या गुन्हेगारांना तुरुंगात स्थानबद्ध करून ठेवले जात असले तरी त्यांचेही आत काही कायदे कानून असतात, याचा प्रत्यय कोलवाळ तुरुंगात (colvale central jail) पुन्हा एकदा आला. कोलवा येथे दोन अल्पवयीन मुलींवर सामूहिक बलात्काराच्या (Rape Case) आरोपाखाली या तुरुंगात ठेवण्यात आलेल्या तीन संशयितांना इतर कैद्यांनी (prisoners) चक्क विवस्त्रावस्थेत उठाबशा काढण्याची शिक्षा दिली. या शिक्षेची अंमलबजावणी होत असतानाचा व्हिडिओ (Video) काढून तो व्हायरल करण्यात आल्याने कोलवाळ तुरुंगातील कारनामे पुन्हा एकदा चर्चेचा विषय बनले आहेत. (Accused Punished without clothes in colvale Prison, Goa)

तुरुंगात गुन्हेगारांना ठेवण्यात येत असले तरी तेथेही काही गुन्ह्यांना माफी नसते. त्यात स्वतःच्या आई-वडिलांचा खून करून आलेले आरोपी तर दुसरे अल्पवयीन मुलींवर लैंगिक अत्याचार करणारे आरोपी. असा कोणताही आरोपी तुरुंगात आल्यास त्याला इतर कैद्यांकडून शिक्षा ही ठरलेलीच असते. त्याच कायद्याला अनुसरून या बलात्कार प्रकरणातील तीन कैद्यांना विवस्त्र करून त्यांच्याकडून उठाबशा काढून घेण्यात आल्या.

‘टायगर’नेही बनवला होता व्‍हिडिओ

दरम्‍यान, सध्या ज्याचा हवेरी येथे खून झाला त्या अन्‍वर ऊर्फ‘टायगर’ या गुंडाला याच तुरुंगात ठेवण्यात आले होते. त्यावेळी इतर कैद्यांना धाक दाखविणारा अन्वरचा एक व्हिडिओ असाच व्हायरल झाला होता. त्यावेळीही कोलवाळ तुरुंगातील ठिसूळ सुरक्षाव्यवस्था अशीच लोकांसमोर आली होती. त्यानंतर या घटनेची चौकशीही सुरू करण्यात आली होती, पण त्या चौकशीचे पुढे काय झाले ते अद्याप समजू शकले नाही.

उलटसुलट प्रतिक्रिया

घटनेचा व्हिडिओ व्हायरल झाल्यावर समाजमाध्यमांवर उलटसुलट प्रतिक्रिया व्यक्त केल्या जात आहेत. काही जणांनी अशा नराधमांना अशीच शिक्षा झाली पाहिजे, असे म्हटले आहे तर काही जणांनी हे चित्रिकरण करण्यासाठी जेलमधील कैद्यांकडे मोबाईल कसा आला आणि तुरुंगात जेलगार्ड असताना असे प्रकार होतातच कसे, असे प्रश्‍न उपस्थित केले आहेत.