पणजी : राजधानी पणजीत तीन प्रवासी बस एका रात्रीत जळून खाक झाल्याने खळबळ उडाली होती. पणजीतील आंतरराज्य बसस्थानकावर या तीनही बस पार्क करण्यात आल्या होत्या. मात्र या बस अचानक आगीच्या भक्ष्यस्थानी पडल्याने चर्चांना उधाण आलं होतं.

या बसेसना जाणीवपूर्वक आग लावली असल्याचा संशय व्यक्त करण्यात आला होता. त्यातच या प्रकरणातील आरोपीला आता पोलिसांनी ताब्यात घेतले आहे. आरोपीचे नाव ओंकार विलास शिलेवंत ( वय - 21, रा. चारगाव कराड, सातारा, महाराष्ट्र) असून त्यानेच या बसेसना आग लावल्याचे कबूल केले आहे.

आग लावण्यामागचे कारण अद्याप स्पष्ट झाले नसून पुढील तपास सुरू आहे. तात्काळ आरोपीला पणजी पोलिसांनी ताब्यात घेतले आहे.