Goa Crime केपे येथील एका अल्पवयीन मुलीला फूस लावून पळवून नेल्याप्रकरणी केपे पोलिसांनी किशन प्रकाश यादव (19) सोनारभाट साळगाव (मूळ उत्तरप्रदेश) येथील युवकाला अटक केली आहे. सीसीटीव्ही फुटेज आणि स्थानिक गुप्तहेरांच्या मदतीने अपहरण प्रकरणात सहभागी असलेल्या एका आरोपीला पकडण्यात पोलिसांना यश आलंय.

केपे पोलिसांनी दिलेल्या माहितीनुसार दि. 22 फेब्रुवारी रोजी सकाळी सदर मुलगी कॉलेजमध्ये जात आल्याची सांगून घराबाहेर पडली होती. ती दुपारी घरी न आल्याने सदर मुलीच्या आईने केपे पोलीस स्थानकात तक्रार दाखल केली होती.

त्यानुसार केपे पोलीसांनी तापसकामाला सुरुवात केली असता मुलीच्या मोबाइल नंबर तसेच इतर माध्यमातून तपास लावला असता काल रात्री दि. 26 रोजी मडगाव रेल्वे स्थानकावर दोघांनाही ताब्यात घेतल्याचे पोलीस निरीक्षक दीपक पेडणेकर यांनी सांगितले. ती दोघेही उत्तर प्रदेश मध्ये पळून जाण्यासाठी रेल्वे स्थानकावर आले होते अशी माहिती पोलिसांनी दिली.

केपे पोलिसांनी यादव याला आज केपे न्यायालयापुढे उभे केले असता दोन दिवसांची पोलीस कोठडी सुनावण्यात आली असून सदर मुलीला सर्व कायदेशीर सोपस्कार पूर्ण करून पालकांच्या स्वाधीन करणार असल्याचे पेडणेकर यांनी सांगितले. पुढील तपास केपे पोलीस करीत आहेत.